التخطي إلى المحتوى الرئيسي

حكمة ملفوفة في رغيف

 - "You've always had the power, my dear. You just had to learn it for yourself."

الجملة اللي بتفاجأنا بيها الساحرة في نهاية فيلم The Wizard of Oz وبتفاجأ دوروثي نفسها "الحل معاها من بداية رحلة توهانها" لأ وكمان فين؟ في جزمتها اللي في رجليها من اول الفيلم ! يعني الرحلة الطويلة العريضة دي، والفيلم/الكارتون اللي مليان مغامرات وغنا - علي حسب انت شوفت انهي نسخة عزيزى القارئ - كان ممكن نتجنبه كله، لو بس اي حد / الساحرة نفسها! كان عّرف دوروثي السر الخطير ده! بس لأ إزاي.. هي كان لازم تتعلم ده لوحدها!

نهاية تعصّب، مش كده! ومش بس الفيلم ده اللي يعصب! زمان وأنا اصغر كنت بتعصب من كل الكلام بتاع القوة جواك! وانت تقدر! والمتاهة في عقلك يارفعت! ولو عقلك لاعبك لعبه.. وحاجة كده شبه اي سوبر هيرو لما يبدء يؤمن بنفسه ويجمع طاقته عشان يهزم الشرير! كيليشه اتعمل عليه الف حبكة!

مكنتش بفهم ليه مفيش short cut ! او بالعربي "المختصر المفيد" يعني ليه ولامؤاخذة  محدش بيلفلي الحكمة دي كلها في كيس ولا يعملها ساندويتش او حتي roll صغير كده! خصوصاً يعني اني - او هكذا ادعي - بفهم بسرعة وبلقطها وهي طايرة! 

فـ ليه بقي هاه؟ ليه؟ 

الحقيقة ان الاجابات هنا هتكون كتير ومتنوعة! وللاسف انا اخدت وقت كبير علي ما فهمت  "ليه" لازم تكمل سعى وتستمر في الرحلة، "ليه" مينفعش حد يحط في ايديك كتيب فيه كل الطرق المختصرة ويقولك امتي تلف يمين وامتي تلف شمال، وامتي ترجع عشان هذا الطريق اخرته لحن حزين!

الحياة - من وجهة نظرى الصغيرة - عزيزي القارئ، قائمة علي مفاهيم الأختبار والأختيار! انت كل يوم بتتحط قدام خيارات مختلفة واختبارات مختلفة.. والموضوع ده بيفرق جداً معاك على المدي الطويل سواء بالاحسن او الاسوء! ومش دي قصتنا هنا.. لكن العنصر الأهم من ورا الأختبارات والأختيارات هو إدراك المعني بالتضاد! يعني ايه؟ 

يعني انت لازم تلبس الجزمة في رجليك عشان تفهم اذا كانت مناسبة ولا لأ! وليه غيرك رضى بيها او مرضيش! ولازم تغلط وتدفع تمن غلطتك، عشان تتعلم تفكر وتختار صح إزاي! فـ تفهم انه "محدش بيتعلم ببلاش" مكنش القصد منها الفلوس بس، على قد ما هو خليط من فلوس ووقت ومجهود! ولازم تجرب الألم عشان منظورك عن الحياة الطبيعية يختلف تماماً! وقد تتسأل هي ايه اصلا الحياة الطبيعية دي؟
ومش قصدي هنا إنك محتاج تعيد خطوات الأنسان الأول من اكتشاف النار او طرق دفن الجثة! ولا تبدء من حيث انتهي الأخرون وتمشي بملخص الحكمة البشرية المستلهمة من مغامرات الآخرين وأفكارهم عن انتصاراتهم بأنها أعظم ماجاء على قلب بشر!
وأفتكر انه في وقت ما في حياة سيدنا موسي - النبي اللي تلقى الحكمة من الرب نفسه - راح للخضر عشان يتعلم منه وكان لا يستطيع عليه صبرا لانه شايف انه تلقى الحكمة من ربه فـ بأى حال من الأحوال ممكن يضيف له عبد من عبد الله شئ تاني ويبهره بعلمه! 
ولأن الحياة في المطلق، مش قطعة Puzzel او شفرة -شخص ما- في عالم ما- قدر يحلها وكله هيمشي علي خطاه! لكنها شفرة بأكواد مختلفة لكل شخص بيصحي كل يوم يفكر في حلها! وكل يوم مع المحاولات بتتغير الأنا بتفاصيلها، احيانا للأحسن واحيانا للاسوء! وإجمالا ده مش مهم! المهم إنك تعيش وتحاول، وتفضل فاهم إنك مجبتش الآخر ولا قفلت المنهج - لا انت ولا غيرك - لأن الحياة بأختبارتها وخياراتها ملهاش آخر! وانه حرفياً ومجازياً مفيش حكمة ملفوفة في رغيف ممكن تحلها.


تعليقات

المشاركات الشائعة من هذه المدونة

كيف ‏بدأت ‏نوبات ‏القلق

- بداية الـ anxiety disorder معايا كانت تقريباً من 2010 .. كنت لسه في الجامعة وبدأت أدخل في دوامة اكتئاب بسيطة سببتلي أرق بشع ( كنت بنام ساعتين في اليوم مثلاً) وانعدام الرغبة في الأكل. - في أواخر 2012 الـ anxiety بدأ يسببلي مشاكل واضحة في المعدة، وبقي سهل جداً لو توترت زيادة عن اللزوم اجيب كل اللي اكلته! ووقتها وزني نزل من 87 لـ 77 في فترة أقل من شهر! - في 2015 عرفت الـ Panic attack لأول مرة. جاتلي في الشغل! والشهادة لله دي كانت أعنف مرة. بدأت بعياط هادي وبعدها ضيق تنفس ثم انخفاض حرارة الجسم مع رعشة ثم رؤية ضبابية بالكامل ودوخة مع زيادة ضيق التنفس! افتكرت يومها اني هموت خلاص. وعشان افوق منها اخدت وقت وباقي اليوم كنت مرهقة جداً ونفسي تقيل. - في 2018 مشاكل الأرق بدأت ترجع وقررت احاربها بممارسة الرياضة 3 ساعات على الأقل يومياً. كنت بخلص شغل، اروح الجيم، اروح البيت اخد شاور وانام! وده بالنسبالي كان يوم عظمة! -من 2019 وطبعاً خلال 2020 بعاني بشكل شبه يومي مع الـ anxiety وال Panic attack واوقات كتير أساليبي في محاربتهم بتفشل وبستسلم للنوبات! - رحلة 10 سنين تقريباً مع "الكلاب السعرانة الل...

من شرفة القمر إلى دهاليز العقل

أتأمل البدر المكتمل من مقعدي الخلفي في السيارة، أتابعه طوال الطريق وهو يمرّ من وسط الغيوم إلى السماء الصافية، وهكذا دواليك. أتابعه ببلاهة طفلٍ في الرابعة من عمره، يظن فرِحًا أن القمر يتبعه أينما ذهب تربطني بالقمر علاقة لا أفهمها كثيرًا، لكني أحبها. أعشق مشاهدة البدر، ويمكنني أن أحدق فيه لساعات دون ملل. وعلى الرغم من معرفتي بأن القمر لا يسير معي حقًا، إلا أنني أنزعج كثيرًا حين تحجبه الأبراج والعمارات العالية عني فجأة! أكره القاهرة في معظم الأوقات لأسباب عديدة، وربما كانت هذه من أبرزها . على مدار أعوام، كان القمر صديقي الوحيد، لا يملُّ منّي.  أنا صاحبة العقل الذي لا يهدأ ولا ينام. أحدثه كثيرًا، وأصمت أكثر عندما تتداخل الأفكار في رأسي، وتغمرني مشاعر متناقضة لا أستطيع التعبير عنها . تعلمت مؤخرًا دعاءً أكرره يوميًا: "اللهم اصرف عني شتات الأمر والعقل والتفكير". أتمسك به كلما عدت من شرود طويل بين مئات الأفكار والتساؤلات . مؤخرًا، وصفني أحدهم بأنني هادئة. وقالت لي أخرى إن والدتها تتمنى ابنة مطيعة مثلي! أثار الأمر دهشتي لوهلة، ومرَّ أمام عيني شريط طويل من المواقف - بطول سنواتي الأرب...

في وصف حالة "علي ما يبدو وتقريباً كده" !

ولأننا مش واثقين في حاجة/حد بشكل كامل فـ بتفضل تعاملاتنا كلها بين قوسين اسمه " تقريباً او Almost" فـ نكررها أكتر من مرة في وسط كل جملة بنقولها ! فأقولك إني تقريباً قربت أوصل للبيت، وتقريباً كده أنا أتغيرت .. وإني تقريباً بتضايق لما يتقال ولو بالهزار إني "مسترجلة" مع أنها حقيقة مقدرش أنكرها! او إني تقريباً مبعرفش أعبر عن اللي جوايا صح غير بالكتابة! و إني تقريباً كده انا لسه بحبك وفكراك!  و أني كنت تقريباً بشم ريحة اللي بحبهم لما يطول غيابهم عني، لكني تقريباً فقدت حاسة الشم !  وأني ساعات ببقي تقريباً مبسوطة وراضية بكل تفصيله في حياتي لدرجة إني مبفهمش هو أنا كنت متضايقة ليه؟!  وإن تقريباً اللون الأزرق لوني المفضل او يمكن الرمادى، فعلاً معرفش! او إني تقريباً بحب الـ random photos اللي بتكون علي ألبوم الموبايل وبسرح فيها بالساعات وإن تقريباً نفس الصور اللي  بتضحكنى بتسبب لي حزن كبير!  "تقريباُ" عند اللي زي مش مجرد كلمة كده والسلام ، هى أقرب مايكون لـ وصف حالة بنعيشها ! وصف لـ خط النص، مابين القرب او البعد الكامل!  it's " Almost "  but not...