الجو النهاردة حقيقي جميل! محتاج نخرج نتمشي ونسمع مزيكا وياسلام لو زرنا النيل ، بس أنا اصلا صاحي من النوم مزاجي عكر وكمان ضغطي واطي .. لأ وزيادة في الرزلة محدش من أصحابي فاضي.. اصله كان يوم حد ، ومحدش كان فاضي لحد.. وانا صعبان عليا يضيع اليوم ، هقضيها كده مهموم.. شربت فنجان قهوة وشربت كمان شاي.. سمعت كام تراك مزيكا بحبه وغنيت سلملنا علي التروماي.. ونزلت اقيس الضغط اكمني لسه حاسه بدوخة.. وبرغم كل المحاولات الضغط لسه واطي انا شكلي منحوسة..! يعني هرجع البيت وقفايا يقمرعيش.. هعيش في دور العيانة واقفل بلكونة وشيش! طب اجيب حتى فيشار او غزل بنات او أمشي اعاكس فى الصبيان والولاد ! وبعدها اعزمنى على حمص شام واروح اتعشي وانام :D
ربنا خلق الكتابة عشان الغلابة اللى زى يعرفوا يتفلسفوا ويطلعوا كلاكيعهم على الناس براحتهم! المهم يعنى ربنا يجعلنا ضيوف خفاف على قلب بعض ، حبوا نفسكم وحبوني معاكم..♥