التخطي إلى المحتوى الرئيسي

المشاركات

عرض المشاركات من يوليو, ٢٠١٧

للبُعد أبعادٌ متعدده

عشان البُعد بيقسي القلوب علي بعضها والخصام لما تطول مُدته بيسحب من المشاعر ودّها فـ نتعلم نسكت ومنتكلمش.. وكل الكلام اللي كان سهل يتقال بقي صعب يطلع وميتحشرش!  ومساحة العشم ما بينا تضيق.. وتظهر بدالها فجوة بحجم كل اللي كان بيني وبينك!  فـ تبقي واحشاني وافتقد وجودك ومقدرش اقولك فينك!  فـ نبعد أكتر ونقرر نسيب اللقا بينا للصدفة زي زمان، من غير مواعيد!  ونمشي ندور علي بعض من بعيد لـ بعيد..  يمكن الصدفة تصلح اللي اتكسر او تهد اللي باقي.. ومعنديش تفسير للي حصل غير إنه في وقتٍ ما محدش فينا كان باقي! زمان كنا بنتفشخر بأننا مهما عملنا في بعضنا، عمرنا فـ يوم م هنبعد! وادي الوقت جه وكل واحد فينا بيعّند!  وادينا في خط النص..  بتقدمي خطوة وترجعي، واخاف ارجع حياتك تتوجعي! عايزة الحق أنا زيك معرفش.. عهد قسم الرغيف نصين بينا كـ أصحاب إزاي متقدرش،  وكل م أرسى على قرار ابص ع اللي فات بيني وبينك - بحلوه ومره -  ومقررش! مفيش سبب واضح للرحيل ولا سبب يحلىّ القعاد!