هل للحب شروط؟ يعني عشان
تحبني وافضل جزء من حياتك لازم من وقت للتاني أقدم ليك شىء بالمقابل؟
معظمنا واحنا صغريين
اتربى علي نظرية التبادل او الـ Exchange حاجة كده زي خلص الطبق وهجيبلك حاجة حلوة.. حَل كويس في الامتحان
وهات درجة حلوة وهفسحك.. اسمع كلامي عشان أحبك.. الخ من الأمثلة! نظرية مبنية على
"الشرطية" معتمدة على تنفيذ رغبات الآخرين من خلالك - حتي لو انت مش
عايز - عشان في المقابل توصل للشىء اللي انت عايزه او محتاجه! او زي ما بيقولوا
بالبلدي "قدم السبت، تلاقي الأحد"
وبغض النظر عن فاعلية
النظرية او كونها اخلاقياً / نفسياً مقبولة او لأ، بس ده بيخلينا نرجع للسؤال اللي
طرحته في الأول، هل حبنا لبعض مشروط - اياً كان مسمي العلاقة؟
من فترة قريت مقال
بيسألوا فيه الأباء والأمهات عن "طفلهم المفضل" السؤال اللي معظمهم
بيردوا عليه بأنه طبعاً مفيش طفل مفضل وإني بحبهم كلهم زي بعض! الحقيقة المختلف في
المقال ده ان كذا أب وأم اعترفوا ان ليهم فعلاً طفل مفضل، والأسباب اتنوعت، عشان هي بنتي الأولي -
عشان هو أكتر حد بقدر اتفاهم معاه - عشان شخصيته أقرب لشخصيتي - وفي
أم أعترفت انه في وقت ما كان صعب عليها تحب واحد من أطفالها - بنفس قدر حبها للآخر
- بسبب طباعه المختلفة واللي مكنتش قادرة تفهمها وتتعامل معاها!
فى رواية The Metamorphosis او المسخ، كافكا بيتكلم
بشكل مباشر عن علاقتنا الإنسانية الشديدة القرابة - بصلة الدم الأولى - واللي إحنا
عادةً بنشوف الحب فيها غير مشروط! الرواية بتدور في محيط اسرة شخص هو العائل
الرئيسي ليها بيصحي في يوم يلاقي نفسه "صرصار" وإزاي امه وابوه واخته
بيتعاملوا مع "الحدث" ده .. وبيبدء يصدمنا بشكل تدريجي/ بارد / كئيب
بحقيقة عدم وجود الحب الغير مشروط! وإنك ببساطة لو صحيت في يوم الأيام وانت فاقد
قدرتك على العطاء للأشخاص الأقرب ليك - بالشكل اللي هما متعودين عليه - مع الوقت
وبالتدريج هتفقد حبهم وارتباطهم الإنساني بيك. وحتى عطائك فى الماضي وتفانيك
عشانهم - واللي كان ممكن يشفع ليك في البداية - هيتنسي مع الوقت ومع استمرار عدم
قدرتك على المنح فى المقابل!
حاجة
كده زي Jenny Salte لما قالت في برنامجها I don't earn the love, unless i give something beautiful that
goes out
فهل إحنا فعلاً بنحب اللي
بنحبهم لشخصهم؟ ولا لازم من وقت للتاني يقدمولنا اللي يخلونا نتمسك بيهم؟ وهل
الجميل اللي لايق عليه الحب والغرام لو بطل يبقي جميل هنفضل نحبه؟ وايه الأسباب
اللي بتخلينا نحب اللي بنحبهم؟ وايه الأسباب اللي بتخلينا نبطّل نحبهم؟ وهل أنت /
أنا نستاهل نتحب فعلاً وليه؟ عشان الشكل ولا الروح والشخصية ولا على اللي قادرين
نقدمه للي حوالينا؟
تعليقات
إرسال تعليق