الساعة 1:47 A.M
بلمح بموبايلي تاريخ اليوم 1/9
!اللّه سبتمبر بدء.. دق قلبي دقتين، دقة إنبساط ودقة وجع
سبتمبر لونه ازرق.. زي البحر بدرجاته، شكله حلو ومبهج لكنه يخوف من كُبره وعمقه اللي متعرفش مخبي عنك إيه؟
هكمل الـ 30 آخر الشهر خلاص، كبرت؟ عقلت؟ اتغيرت؟ عايزة اعمل ايه قبل ما اقفلهم رسمي؟ اسئلة كتير مش مهتمة ارد عليها! مفيش سباق هنا، ولا عداد بيعد عليا، انا قررت اسيبه في العشرينات مع بقية اللي سيبتهم وسابوني!
بكرة هيكون فات علي وفاة تيتا سنتين! من يوم وفاتها ولما أنساها واتشغل عنها تيجلي الحلم زعلانة، وأفضل أصالح فيها متترضاش، لحد ما أصحي واصلي وأدعيلها واقراء على روحها السلام وابعتلها قرآن.. جاتلي من كام يوم في الحلم تونسني، قولتلها اجيبلك أكل ياتيتا قالتلي لأ انا اللي عزماكِ استني هأكلك ❤️ وحشتني ياتيتا والله ووحشني بيتك، مش حلو من غيرك، ومش عايزة اطلعه وانتِ مش فيه!
مين اكتر حد بتتخانقي معاه؟ بيسألني، فأرد وانا بضحك "نفسي" طب ومين اللي بيسلك بينكم؟ فـ أقول شخصية تالتة كده بتيجي تسب للـ 2 دول وتقولهم يخرسوا!
سبتمبر جاي ومعاه مشاعر متلخبطة.. خلطة نهايات وبدايات، وذكريات حلوة غالبة عليها المرارة، شوية حسرة على حياة قديمة كانت فيها الدنيا أبسط من كده.. كنت فيها أنا ابسط واروق من كده! ونسمة أمل جاية من بعيد بشوية هوا ساقعين بترطب بحنية على قلبي
أعياد ميلاد اغلب اصحابي الحلوين واللي اساميهم بتبدء بـ نون في سبتمبر 💜
سبتمبر جهّ ويارب يبقي حاجة حلوة 🙏🏼
تعليقات
إرسال تعليق