التخطي إلى المحتوى الرئيسي

هذا الوقت سيمضي

أصعب حاجة في الـ anxiety waves هو محاولاتك للسيطرة عليها قبل ما تتحول لـ Panic attack.
نوبة القلق او الـ anxiety زي مابيقولوا عادةً بتهاجم قلبك/عقلك على حسب طبيعتك الشخصية، ولو مقدرتش تطلع بره الـ Loop السلبية اللي هتسحلك جواها، فمرحباً بك في سجنك الجديد المصمم مخصوص عشانك.. لأن دلوقتي النوبة هتتضاعف وتتغذي على علاقاتك كلها، حياتك، نظرتك للمستقبل. كله هيتسمم وتشوبه نظرة شك وتساؤلات لامنتهية مصحوبة بألف تحليل.. ومين هنا اللي غلط انت ولا هما؟! وفين الحقيقة، عندك ولا عندهم؟ فلان بيحبك ومهتم فعلاً؟ ليه؟ وإزاي وايه مصلحته؟ ايوه يعني انت تتحب ولا متتحبش؟! انا شايف انك متتحبش بصراحة، هتموت وهتتنسي، كل مشاريعك وخططك هتفشل! أنت اصلا فاشل! عايز تتكلم عن اللي جواك؟ مين هيستحملك وليه؟ انت تقيل حتي على نفسك! لو عرفوا نص اللي في دماغك بس هيخافوا منك! هيقولوا كئيب وسلبي وشايف الحياة سوداء! ارجع خطوة لورا، أعزل نفسك، محدش ناقصك!
دي شوية اسئلة بسيطة من اللي بتدور في دماغ اي حد بيتعرض لنوبة - واللي انا شخصياً منهم - الموضوع اغلب الوقت بيمثل تحدي صعب، لانه سهل يفلت وال wave تفضل مكملة لأيام وتسبب نوبات فزع متكررة علي اختلاف اعراضها!
الـ anxiety ملوش علاقة بثقة الشخص بنفسه، ولا بدرجة إيمانك.. إلخ! هو مبني بالكامل على مخاوفك الشخصية وأغلب الوقت بيكون في trigger words او أشخاص او مواقف بعينها بتمثل نقطة البداية. طبعاً في اللي ممكن تتجنبه من الأول، لكن بما ان الحياة مش بالبساطة دي فالحل هنا هو انك تحاول تخفف الضغط بأي نشاط ايجابي حتي لو تمثل في استدعاء ذكريات لمواقف سببت ولو طمأنينة بسيطة استمرت لثواني.. مثلاً انت على البحر وقت الشروق، مساعدة قدمتها بدون مقابل لشخص محتاج وشعرت بعدها بالرضى، وقت حسيت فيه إنك ناجح وسعيد.. استعديهم كلهم ان لزم الأمر! فشلت.. عادي بتحصل!
برضه متسبش نفسك للـ anxiety وتوابعه. الوضع هيفرق لو اتكلمت مع حد! دكتورك النفسي او شخص موثوق فيه وقريب منك وعارف دماغك ممكن تسوحك لفين. حاول توضح له طبيعة مشاعرك وافكارك واتكلم كتير وطلع اللي جواك.. هترتاح و هتلاقي حد بيشاركك الدائرة المفرغة اللي في دماغك. عالأقل انت مش لوحدك.
هرجع واقولك إني مدركة تماماً السبب اللي بخلينا نخاف نتكلم عن اللي بيحصل في دماغنا وقت النوبات. الخوف من أنك تتشاف متشائم او كائن كئيب او فاقد الثقة بالنفس، واللي عادةً بتكون صفات ابعد ما تكون عن طبعك الشخصي بس بتفرضهم عليك حالتك النفسية والعقلية وقت النوبة. وفي المطلق إنك تـ open up to someone بيمثل مخاطرة وتحدي، لكنه أحسن بكتير من استمرار معاناتك مع نفسك!
زي ما قلت ال anxiety مبني على مخاوفك الشخصية، عشان كده جزء مهم من العلاج - اللي انا شخصياً بمارسه - مرتبط بأني افهم نفسي أكتر واحبها واتقبلها بكل عيوبها واخفف من أحكامي القاسية عليها. برضه وجود روتين يومي خاص بنشاط بيسحلك تماماً بيساعد في التقليل من حدة النوبات، بالنسبالي كنت بمارس الرياضة لاكتر من 3 ساعات يومياً، كذلك الكتابة او القراءة وسماع المزيكا او القرآن والصلاة لفترات طويلة. وطبعاً أحيانآ بيبقي اليوم مشغول جداً فبكتفي بالمشي لمدة ساعة ولا حاجة!
حاجة كمان أخيرة - وهي الصراحة سبب الرغي ده كله - كتروا من الكلام الحلو لبعض. خصوصاً في وقت زي دلوقتي، العالم كله عايش على أفكار سلبية وفرصة التعرض لنوبات القلق والفزع مضاعف، وحقيقي كلنا محتاجين شوية حب وحبة لطافة ع الخفيف عشان الايام تمر بينا بسلاسة وسلام 💚 ولو معرفتش تكون لطيف عالأقل متكونش مصدر تعاسة!
"When given the choice between being right or being kind, choose kind"
ملحوظة* كل الكلام ده مبني على تجربة شخصية مصحوبة بشوية قراءات على حبة جلسات نفسية.

تعليقات

المشاركات الشائعة من هذه المدونة

كيف ‏بدأت ‏نوبات ‏القلق

- بداية الـ anxiety disorder معايا كانت تقريباً من 2010 .. كنت لسه في الجامعة وبدأت أدخل في دوامة اكتئاب بسيطة سببتلي أرق بشع ( كنت بنام ساعتين في اليوم مثلاً) وانعدام الرغبة في الأكل. - في أواخر 2012 الـ anxiety بدأ يسببلي مشاكل واضحة في المعدة، وبقي سهل جداً لو توترت زيادة عن اللزوم اجيب كل اللي اكلته! ووقتها وزني نزل من 87 لـ 77 في فترة أقل من شهر! - في 2015 عرفت الـ Panic attack لأول مرة. جاتلي في الشغل! والشهادة لله دي كانت أعنف مرة. بدأت بعياط هادي وبعدها ضيق تنفس ثم انخفاض حرارة الجسم مع رعشة ثم رؤية ضبابية بالكامل ودوخة مع زيادة ضيق التنفس! افتكرت يومها اني هموت خلاص. وعشان افوق منها اخدت وقت وباقي اليوم كنت مرهقة جداً ونفسي تقيل. - في 2018 مشاكل الأرق بدأت ترجع وقررت احاربها بممارسة الرياضة 3 ساعات على الأقل يومياً. كنت بخلص شغل، اروح الجيم، اروح البيت اخد شاور وانام! وده بالنسبالي كان يوم عظمة! -من 2019 وطبعاً خلال 2020 بعاني بشكل شبه يومي مع الـ anxiety وال Panic attack واوقات كتير أساليبي في محاربتهم بتفشل وبستسلم للنوبات! - رحلة 10 سنين تقريباً مع "الكلاب السعرانة الل...

من شرفة القمر إلى دهاليز العقل

أتأمل البدر المكتمل من مقعدي الخلفي في السيارة، أتابعه طوال الطريق وهو يمرّ من وسط الغيوم إلى السماء الصافية، وهكذا دواليك. أتابعه ببلاهة طفلٍ في الرابعة من عمره، يظن فرِحًا أن القمر يتبعه أينما ذهب تربطني بالقمر علاقة لا أفهمها كثيرًا، لكني أحبها. أعشق مشاهدة البدر، ويمكنني أن أحدق فيه لساعات دون ملل. وعلى الرغم من معرفتي بأن القمر لا يسير معي حقًا، إلا أنني أنزعج كثيرًا حين تحجبه الأبراج والعمارات العالية عني فجأة! أكره القاهرة في معظم الأوقات لأسباب عديدة، وربما كانت هذه من أبرزها . على مدار أعوام، كان القمر صديقي الوحيد، لا يملُّ منّي.  أنا صاحبة العقل الذي لا يهدأ ولا ينام. أحدثه كثيرًا، وأصمت أكثر عندما تتداخل الأفكار في رأسي، وتغمرني مشاعر متناقضة لا أستطيع التعبير عنها . تعلمت مؤخرًا دعاءً أكرره يوميًا: "اللهم اصرف عني شتات الأمر والعقل والتفكير". أتمسك به كلما عدت من شرود طويل بين مئات الأفكار والتساؤلات . مؤخرًا، وصفني أحدهم بأنني هادئة. وقالت لي أخرى إن والدتها تتمنى ابنة مطيعة مثلي! أثار الأمر دهشتي لوهلة، ومرَّ أمام عيني شريط طويل من المواقف - بطول سنواتي الأرب...

في وصف حالة "علي ما يبدو وتقريباً كده" !

ولأننا مش واثقين في حاجة/حد بشكل كامل فـ بتفضل تعاملاتنا كلها بين قوسين اسمه " تقريباً او Almost" فـ نكررها أكتر من مرة في وسط كل جملة بنقولها ! فأقولك إني تقريباً قربت أوصل للبيت، وتقريباً كده أنا أتغيرت .. وإني تقريباً بتضايق لما يتقال ولو بالهزار إني "مسترجلة" مع أنها حقيقة مقدرش أنكرها! او إني تقريباً مبعرفش أعبر عن اللي جوايا صح غير بالكتابة! و إني تقريباً كده انا لسه بحبك وفكراك!  و أني كنت تقريباً بشم ريحة اللي بحبهم لما يطول غيابهم عني، لكني تقريباً فقدت حاسة الشم !  وأني ساعات ببقي تقريباً مبسوطة وراضية بكل تفصيله في حياتي لدرجة إني مبفهمش هو أنا كنت متضايقة ليه؟!  وإن تقريباً اللون الأزرق لوني المفضل او يمكن الرمادى، فعلاً معرفش! او إني تقريباً بحب الـ random photos اللي بتكون علي ألبوم الموبايل وبسرح فيها بالساعات وإن تقريباً نفس الصور اللي  بتضحكنى بتسبب لي حزن كبير!  "تقريباُ" عند اللي زي مش مجرد كلمة كده والسلام ، هى أقرب مايكون لـ وصف حالة بنعيشها ! وصف لـ خط النص، مابين القرب او البعد الكامل!  it's " Almost "  but not...