لـ حبيبي ابن الناس الكويسين

واكتشفت إني ميهمنيش حاجات كتير في ترتيبات الجواز وشراء الجهاز والعفش وهكذا.. ميهمنيش غير تفصيلة وجودك أنت.
يمكن لما تيجي نختار هنسكن فين، فـ اصدمك وأقولك لأ انا مش عايزة شقة جنب أمي زي كل البنات.. أنا بس عايزة  شقة فيها بلكونة بحري حلوة تساعنا إحنا الاتنين، فيها كرسين وتربيزة صغيرة.. املا سور البلكونة زرع بألوان مبهجة ونسهر فيها بالليل نسمع أم كلثوم ونشرب شاي بالنعناع.
يمكن لما تيجي أحب اتفرج علي الجهاز واختار معاك كل تفصيلة فيه.. لون المطبخ وشكل التلاجة ونقشة السيراميك، واوضة النوم المحندقة بالدولاب والكومدينو من غير تسريحة عشان بخاف من المرايات، ونختار سوا ستاير بلكونة الصالة والسفرة اللي مفيش معاها نيش، بس معاها ركن قهوة صغير عليه انواع مختلفة من البن حسب مزاج اليوم وفوقها سبورة مكتوب عليها بطابشير ألوان إني بحبك أكتر من القهوة .. وجنبهم المكتبة اللي هحط فيها كتبي وتماثيل صغيرة وصور ليا وليك..
هتنقي معايا السجاد.. ومتقلقش مش هنجيب كتير، ده بس للشتا لكن طول الصيف هنشيلهم ونفضل حافيين

بخاف من الخلفة وتربية طفل ومسئولية انشاء بني آدم كامل سوى ومتزن نفسياً وبحسها خطوة اصعب من الجواز نفسه.. لكن يمكن لما اقابلك أغير رأيي، وابقي نفسي اجيب طفل يشبهك ويشبهني.. حته مني ومنك ماشية على الأرض، نحبها أكتر من حبنا لبعض! نتعب ونشقي عشان نطلعه أحسن مننا.. ونتخانق هنربيه إزاي ولما حد من أجداده يدلعوه زيادة نقولهم بطلوا مرقعة هتبظوا الواد.. 

عايزة ابقي اكتر حد فاهمك في الدنيا، ابقي عارفة دماغك آخرها فين.. افهمك من نظرة زي م بيقولوا، ويبقي حضني هو بيتك الوحيد.. وتبقي إنت اللي قاري كل تفصيلة في روحي وجسمي، عارف إني بحبك من أول لآخر نقطة في قلبي وإني حتي لو مقولتهاش كل يوم هعبر عنها بفعل ما.. 

هنكبر سوا وطموحي وطموحك يخدونا لسكك جديدة وتتغير واتغير ونتخانق ونسمع بعض كلام ملوش لازمة في ساعة غصب ونكره بعض، وقبل ما ننام نفتكر لبعض كل لحظة حلوة/مرة عشناها سوا.. فـ تفتكر إنك صاحبي قبل ما تكون حبيبي، وإن مساحة العشم بينا تستحمل أنك تحبني فعز كرهك ليا، وقبل ما تجيني تلاقيني بقولك ما تيجي نتصالح .. ونتكلم ونتعرف علي بعض من جديد ونكتشف في بعض حاجات جديدة تخلينا نحب بعض تاني وتالت وعاشر.. 

هنتكلم عن كل اللي جوانا بصراحة، حتي لو اللي هيتقال بيوجع ويجرح ويخلي كل واحد فينا مش طايق يبص في وش التاني وبعدها نختار نكمل سوا، لأن الحياة مؤلمة وفوضوية ولأن السكة طويلة ومجهدة وأنت الوحيد اللي عايزاه يشاركني الرحلة بكل مافيها، ولأن الحب اللي بينا مش مجرد كليشيهات رومانسية كلها قلوب ودباديب، الحب وجع وألم متواصل وكسرة قلب متكررة.. ولأن الحياة خيارات فأنا هختار إن قلبي يتكسر علي إيدك كل مرة ويبقي عليك مهمة إصلاحه.