التخطي إلى المحتوى الرئيسي

وكل breakup anniversary وانت بخير


"أسمع التراك ده وانت بتقرأ"
لو في درس معين المفروض أكون أتعلمته في خلال مروري الكريم علي الـ 25 ودخولي في الـ 26 ، فهو إن الحب لا يتعلق ابداً بالجدارة " بمعني أصح مفيش حاجة أسمها أنا أستاهل أتحب لمجرد إني بحب! 
إحنا عادةً لما بنحب فلان او فلانة بنتوقع منهم أنهم يحبونا في المقابل او علي الأقل يقدروا الحب ده ، ولما سقف توقعتنا بيقع علينا، إحساسنا بالخيبة والخذلان بياكل فينا.. 
عشان كده لما تحب فعلاً حاول تطرد من دماغك فكرة الحب المتبادل، الحب الحقيقي هو اللي مبنستناش علي اساسه ان الطرف التاني يحبنا زي ما بنحبه او يقدرنا او يقولنا شكراً علي كل محاولة للتعبير عن حبنا ليه.. 
وده لـ سبب بسيط ، لو الطرف التاني فعلاً حاسس بيك وشايف مجهودك المبذول عشان تجذب انتباه وكان فعلاً مهتم هتلاقيه من نفسه بدء يبادلك نفس التصرفات والمشاعر. اما لو كان مش ملاحظ وجودك اصلاً، فـ كل محاولاتك هنا منتهية بالفشل، لأنك مهما كنت جدير بالحب والإعجاب ومهما حاولت تشد انتباهه بأي تصرف يدل على مدى حبك فـ الموضوع خلصان ! الحكاية هنا زي ما بيقولوا لعبة وعمرك ما هتعرف تكسبها ! 
كنت قرأت من فترة عن إزاي ممكن نتقبل فكرة رحيل الأشخاص/ الأشياء، شدتني النظرية المعتمدة على التخلي ! 
اه الموضوع زي ما قرأت بالضبط وأصعب نقطة فيه هي نفسها أسهل نقطة!
النظرية بتقولك إن الشخصيات اللي قررت تبعد عنك، بتكون فعلاً بعدت بكل الطرق الواضحة بس أنت اللي مش واخد بالك!
يعني مثلاً مبقاش مهم أنه يرد عليك لما تكلمه، مش مهتم يعرف أخبارك، من الآخر بطل يحطك كـ شخص رئيسئ في خططه! عشان كده أصحاب النظرية بيشجعوك بمنتهي القوة أنك تتخلى أنت كمان عنهم!

أتخلى عنهم زي ما هما بطلوا يهتموا بوجودك بحياتهم لأنك لو استمريت علي أهتمامك ممكن تتعرض لأسوأ موقف في التاريخ، وهو إن الشخص ده هيحاول يهتم بيك من باب إحساسه بالذنب او الشفقة! 
الناس اللي بنوا النظرية دي بيقولولك كمان إن اللي بيحب بجد عمره ما بيبطل يهتم، اللي بيحب بجد بيفضل موجود حتي لو مكنش عنده إي سبب واضح يدفعه للأستمرار!
علي ناحية تانية فيه اللي قالك " أحب بكل ما بك من قوة حتى تكره " بس الكره مش سهل، وعمره ابداً ما كان إحساس مريح ومش ممكن يساعدك تتخطى مشاعرك وتعيش في سلام.. الكره بياكل الروح ! 
خليني أقولك وصفة أسهل من كده ، حب وابذل كل طاقتك في الحب لحد النقطة اللي هتحس معاها إنك مش قادر تدى الطرف التاني زيادة ! حب لحد النقطة اللي هتبقي فيها مش مهتم فلان او فلانة ده فين او بيعمل ايه ، حب لحد الوقت اللي هتحس فيه إنك وصلت لقاع مشاعرك وإنك واقف لوحدك في عز الوقت اللي كان المفروض يكون فيه جنبك فلان او فلانة اللي بتحبهم وساعتها هتستلم وهتقرر تنهي علاقتك بيه.. 

تعليقات

المشاركات الشائعة من هذه المدونة

كيف ‏بدأت ‏نوبات ‏القلق

- بداية الـ anxiety disorder معايا كانت تقريباً من 2010 .. كنت لسه في الجامعة وبدأت أدخل في دوامة اكتئاب بسيطة سببتلي أرق بشع ( كنت بنام ساعتين في اليوم مثلاً) وانعدام الرغبة في الأكل. - في أواخر 2012 الـ anxiety بدأ يسببلي مشاكل واضحة في المعدة، وبقي سهل جداً لو توترت زيادة عن اللزوم اجيب كل اللي اكلته! ووقتها وزني نزل من 87 لـ 77 في فترة أقل من شهر! - في 2015 عرفت الـ Panic attack لأول مرة. جاتلي في الشغل! والشهادة لله دي كانت أعنف مرة. بدأت بعياط هادي وبعدها ضيق تنفس ثم انخفاض حرارة الجسم مع رعشة ثم رؤية ضبابية بالكامل ودوخة مع زيادة ضيق التنفس! افتكرت يومها اني هموت خلاص. وعشان افوق منها اخدت وقت وباقي اليوم كنت مرهقة جداً ونفسي تقيل. - في 2018 مشاكل الأرق بدأت ترجع وقررت احاربها بممارسة الرياضة 3 ساعات على الأقل يومياً. كنت بخلص شغل، اروح الجيم، اروح البيت اخد شاور وانام! وده بالنسبالي كان يوم عظمة! -من 2019 وطبعاً خلال 2020 بعاني بشكل شبه يومي مع الـ anxiety وال Panic attack واوقات كتير أساليبي في محاربتهم بتفشل وبستسلم للنوبات! - رحلة 10 سنين تقريباً مع "الكلاب السعرانة الل...

من شرفة القمر إلى دهاليز العقل

أتأمل البدر المكتمل من مقعدي الخلفي في السيارة، أتابعه طوال الطريق وهو يمرّ من وسط الغيوم إلى السماء الصافية، وهكذا دواليك. أتابعه ببلاهة طفلٍ في الرابعة من عمره، يظن فرِحًا أن القمر يتبعه أينما ذهب تربطني بالقمر علاقة لا أفهمها كثيرًا، لكني أحبها. أعشق مشاهدة البدر، ويمكنني أن أحدق فيه لساعات دون ملل. وعلى الرغم من معرفتي بأن القمر لا يسير معي حقًا، إلا أنني أنزعج كثيرًا حين تحجبه الأبراج والعمارات العالية عني فجأة! أكره القاهرة في معظم الأوقات لأسباب عديدة، وربما كانت هذه من أبرزها . على مدار أعوام، كان القمر صديقي الوحيد، لا يملُّ منّي.  أنا صاحبة العقل الذي لا يهدأ ولا ينام. أحدثه كثيرًا، وأصمت أكثر عندما تتداخل الأفكار في رأسي، وتغمرني مشاعر متناقضة لا أستطيع التعبير عنها . تعلمت مؤخرًا دعاءً أكرره يوميًا: "اللهم اصرف عني شتات الأمر والعقل والتفكير". أتمسك به كلما عدت من شرود طويل بين مئات الأفكار والتساؤلات . مؤخرًا، وصفني أحدهم بأنني هادئة. وقالت لي أخرى إن والدتها تتمنى ابنة مطيعة مثلي! أثار الأمر دهشتي لوهلة، ومرَّ أمام عيني شريط طويل من المواقف - بطول سنواتي الأرب...

في وصف حالة "علي ما يبدو وتقريباً كده" !

ولأننا مش واثقين في حاجة/حد بشكل كامل فـ بتفضل تعاملاتنا كلها بين قوسين اسمه " تقريباً او Almost" فـ نكررها أكتر من مرة في وسط كل جملة بنقولها ! فأقولك إني تقريباً قربت أوصل للبيت، وتقريباً كده أنا أتغيرت .. وإني تقريباً بتضايق لما يتقال ولو بالهزار إني "مسترجلة" مع أنها حقيقة مقدرش أنكرها! او إني تقريباً مبعرفش أعبر عن اللي جوايا صح غير بالكتابة! و إني تقريباً كده انا لسه بحبك وفكراك!  و أني كنت تقريباً بشم ريحة اللي بحبهم لما يطول غيابهم عني، لكني تقريباً فقدت حاسة الشم !  وأني ساعات ببقي تقريباً مبسوطة وراضية بكل تفصيله في حياتي لدرجة إني مبفهمش هو أنا كنت متضايقة ليه؟!  وإن تقريباً اللون الأزرق لوني المفضل او يمكن الرمادى، فعلاً معرفش! او إني تقريباً بحب الـ random photos اللي بتكون علي ألبوم الموبايل وبسرح فيها بالساعات وإن تقريباً نفس الصور اللي  بتضحكنى بتسبب لي حزن كبير!  "تقريباُ" عند اللي زي مش مجرد كلمة كده والسلام ، هى أقرب مايكون لـ وصف حالة بنعيشها ! وصف لـ خط النص، مابين القرب او البعد الكامل!  it's " Almost "  but not...