رسالة إلى الله

"اشعر بالسواد يجتاحني، اشعر بقلبي مكسورا بين اضلعي، اشعر بالاغتراب والوحدة.. اشعر وكأني شيئا لم يكن ولا اراد ان يكون!

إلهي ارجوك عفوا، ارجوك املاً، ارجوك حباً.. ارجوك عطفاً علي قلباً فزعاً..

دعاك في ظلمات الليل طمعاً في نورك ورضاك.. أدخله فى رحمتك يارب وكن له ولياً ونصيراً"

عارف يارب.. انا مش عارفة حاجة خالص ولا فاهمة حاجة خالص، عاملة زي اللي كان بقاله فترة كبيرة اوي بيجري وفي عز جريه مبقاش عارف هو بيجري ليه ولا ورا ايه بالضبط فـ مع اول حيطة قابلها لبس فيها ووقع علي الارض ومقدرش يقوم.. او بمعني اصح هو مش عارف يقوم تاني لإيه! 
احساس اللي اتزنق بين حيطين لا عارف يرجع ورا تاني ولا عارف يطلع قدام.. 
جوايا كلام كتير اوي يارب ، بس مخنوق جوايا وبيخنقني معاه ، كأنه واقف في حلقي بالعرض! كلهم عايزينى أتكلم وأحكى مالي، بس أنا معنديش اللي احكيه!معنديش غير شوية كلام مش مترتب وملوش معنى ، معنديش غير رغبة قوية جدا في البكا على كل تفصيلة صغيرة في حياتى باظت قبل ما تكمل ، والحاجات اللي كان نفسي فيها وراحت ، والحاجات اللي زهدت فيها بعد ما كان كل طموحي تبقي ليا ! وإحساسي إني كنت مغفلة في قرارت كتير غلط أخدتها ، وجت على دماغي وناس رهنت عليها وخسرت رهاني بمنتهى القسوة ! قلبي بيوجعني وعيني بتدمع لوحدها ، أوقات بحس إني مكسورة جداً وإني عاجزة جداً وإني مش هعرف أهرب من الثقب الأسود ده وانه في يوم من الأيام هيبلعني زي ما الحوت بلع سيدنا يونس "سبحانك ربي إني كنت من الظالمين" 

يارب اللغة ألهمني الكلام! انا حتي عاجزة عن إني افكر في دعاء ارفعهولك واحدد فيه طلبي يمكن ترفع عني البلاء .. ومن كتر اليأس دعتلك تبعتلي المعجزة! انا عايزة المعجزة يارب ، أظهر لي يارب ! أنا عارفة إني بنساك وبتلهي بالدنيا بس أنا مش حمل أنك تنساني! انا مش حمل شيطاني ! وانا مش حمل كل الشروخ اللي جوايا مش هعرف ألصمها لوحدي ، وانت يارب بتبعت البلاء على قد طاقة العبد ، بس أنا لسه كتافي ضعيفة .. ضعيفة جداً ! 

يارب انا عبدك التايه جدا.. المتلخبط جدا، مش عارفة ليه أنا هنا ولا ايه الحكمة من وجودي من عدمه؟! 

ياخالق السماء والأرض حشاك ان تخلق شيئاً عبثا.. أرزقني يارب النور والبصيرة، عديني يارب وخد بأيدي أنا فقدت بصيرتي وكل حاجة قدامي مبقتش واضحة ، كل المعاني والمشاعر زيف ، أنا نفسي زيف ! 

الدايرة بتلف وبتقفل عليا يارب وبتخنقني وأنا مبقاش عندي إي دافع للمقاومة ، حتي أحلامي اللي كانت بتواسيني راحت واتبدلت بكوابيس ! 

روحي تقيلة ومرهقة ومحبطة وإحساسي بقلة الحيلة بيقتلها بالبطئ! الرحمة والسكينة يارب "اللهم إني أعوذ بك من حزنٍ يثقل القلب ويشغل الفكر"
يارب بحق كل نواقص البشر اللى كمالتها معاك أرزقنى النور في طريقى والامل في اني اكمله، والشجاعة على إني اقبل واقع حياتى اياً كان  والقدرة على تغير الطريق لو أقتضى الأمر..