انا واحدة من الناس اللي جزء من مهنتهم الكتابة ، عشان كده صدقني لما أقولك ان تلات تربع الكلام - إلا ما رحم ربي - هجايص في الأساس والهدف منه إنه توصلك مشاعر معينة سواء بالسلب او الإيجاب.. وعليه متصدقش إي كلام إلا لو كان وراه "فعل حقيقي" يثبته بمسمار في القلب !
زمان كانت أكبر مشاكل والدتى معايا هي إني عمري ما قدمت أعتذاري ليها لفظياً ، كنت بقدمه بشكل فعلي.. يعني مثلاً اساعدها في شغل البيت أكتر او اشترى ليها هدية بسيطة او أحاول أغير في نفسي وأبقي أحسن لو اللي زعلها كان تصرف غلط عملته ، والمشكلة إن والدتي كانت بتشوف النوع ده من التصرفات تكبر منى وعدم إعتراف بأخطائي مع إن العكس هو اللي كان بيحصل..! ساعتها فهمت إن الهجايص ليها تأثير هايل جداً وقت الزعل! وبقيت كل مرة نتخانق او نختلف أجري بسرعة أصالحها وأطبطب واعترف بغلطتي - حتى لو فعلاً شايفة إني مش غلط - ولا بأس من دمعتين لزوم التأثير الدرامي ، وهكذا مرة ورا التانية لحد الست الوالدة ما فهمت إن الأعتذار بالطريقة دي مجرد تثبيت بالكلام مش أكتر! وعليه اتفقنا إنه لا مزيد من الهجايص والكلام اللي مفيش منه فايدة ولا رجا ده..
الفقيه "عامر بن عبد قيس" قال (إذا خرجت الكلمة من القلب دخلت في القلب؛ وإذا خرجت من اللسان لم تتجاوز الآذان) يعنى الكلام مهم ومش هننكر دوره ، بس مهم يكون خارج من القلب ومهم كمان انه ميتحولش مع الوقت لـ cliche بائس مفيهوش اي إحساس..
فى أحد مشاهد فيلم Closer ناتالي بورتمان حبيبها بيقولها i love you فـ ترد عليه هي بمنتهى العصبية where is this love؟! وتكمل كلامها بأنها مش حاسة بالحب ده ولا شايفاه ولا لمسته في اي تصرف منه ! وده واحد من المواقف اللي انا شخصياً اتعرضت ليها ، فلان يقولي بحبك ويكررها أكتر من مرة، ومن الناحية التانية كل اللي بيعمله بيقول عكس كده تماماً !
إحنا محتاجين نقدم أفعال بتتكلم بالنيابة عننا ، يعنى مينفعش تكون بتحب فلان او فلانة وانت مش موجود معاه في وقت حزنه ووقت فرحه ! ومينفعش العكس انك تكون بتكره فلان او فلانة ومع ذلك بتابع أخبارهم أول بأول وبتسأل عليهم من الوقت للتانى!
مشهد تانى في فيلم No strings attached ويصادف برضك ان بطلته تكون ناتالي بورتمان ! بس المرة دي هى اللي معندهاش دم ، كانت ماشاء الله بتتعامل مع حبيبها على أساس إنه إنسان آلي، عشان كده لما ببعتله عشان تقوله انه وحشها كان رده بسيط جداً ، قالها انه مينفعش لو وحشها تكلمه وتقوله ولا أنها تبعتله بيها Massage ولا Mail ولا حتى تكتبهاله على الحيطة ! لو وحشها فعلاً كل اللي عليها انها تكبر وتركب عربيتها وتيجي تشوفه وهو هيكون في انتظارها ! اه والله الحكاية كده بمنتهى البساطة !
الكلام لوحده مبيشبعش، يعني ممكن الكلمة تفرق معاك لما تسمعها اول مرة او لما تسمعها بعد زمن من انتظارها وتكون مشتاق تسمعها وممكن تطلب من اللي قالها يكررها كتير من كتر فرحتك بيها، والكلمة اللي بتتقال في وسط موقف معين وتكون انت محتاج تسمعها بتفرق كمان.. زي إن حد يقولك شوية كلام يزود بيه مثلاً ثقتك بنفسك ويدعمك نفسياً ويحسسك انه جنبك ، وهكذا من المواقف..
من الآخر محدش يقدر ينكر دور الكلام ابداً ، لكن خليَ كلامك ده ماشي بالتوازي مع أفعالك ، مش تبقي انت بتتكلم في ناحية و أفعالك ماشية في ناحية تانية خالص ! حاجة كده شبهي لما أوصف لحد الطريق وأقوله خش يمين واشاورله علي الأتجاه الشمال !
تعليقات
إرسال تعليق