التخطي إلى المحتوى الرئيسي

مشاهد محذوفة من الواقع

بقالى فترة كبيرة بفكر فى الكلام اللى مبيتقالش ، الكلام اللى ساكن جوا العيون وممكن جدا تقراه فى عين اللى قدامك وتفضحه او توهمه انك مش فاهم خوفاً من انك تعريه قدام نفسه وتحسسه انك فاهمه لحد مخيف! الكلام اللى فضل مسجون فى القلب وزى ماقالت الست "روحنا واتغيرنا أحنا إلا هو" الكلام اللى سكتنا عنه وقررنا ما نحكيش فيه فأنطفأت بسببه نجمة فى السماء..
وعلى هذا الاساس فالمشاهد اللى جاية فى السرد التالى هى كلام كتير كان المفروض يتقال بس لـ سبب مجهول لا يعلمه إلا الله متقالش..  


- المشهد الأول -


you're waiting for a train, a train will take. you far away. You know where you hope this train will take you, but you don't know for sure. But it doesn't matter, because we will be together 

- مالك ؟! شكلك مقريف وبقالك فترة متغيرة.. فى حاجة حصلت ؟!

= وهو فى حاجة بتحصل ؟!
- مش فاهم !!
= مش مهم !
- لأ مهم .. ايه اللى حصل ؟!
= خايفة.. والخوف عمال يكبر جوايا زي الثقب الاسود ، حساه هيبلع قلبي وروحى !
- خايفة منى ؟!
= لأ خايفة منى انا !
-...!!! 
= ساعات بحس أن ربنا خلق سور حوالين قلبي ، معدش ينفع أحب حد ولا أحس بحاجة ناحية حد ، وانى بقيت تلاجة ! وساعات بحس أنى هغرق فى حالة الاكتئاب اللى لسه يادوب مفرقانى مبقالهاش كام شهر على بعض! عارف دى أكتر حاجة مخوفانى ! انا مش عايزة أكتئب.. مش عايزة ارجع للحالة اللى كنت فيها *بتدمع*
- .............
= قلبي بيوجعنى كتير ورجعت أعيط تانى بدون أسباب واضحة ، انا بضيع منى ! انا أكتر حد عارف نفسه وأكتر حد تايه فى نفسه ! وأحساسي بأنى تايهه وضايعة ومش لاقيه البر اللى هرسي عليه بيموتنى.. بيموتنى بالبطئ !
- وهو ايه البر اللى انتى عايزاه ؟!
= البر اللى هرتاح فيه ، اللى هيحسسنى انى مطمنة ، انى فاهمة ، انى عارفة انا عايزة ايه.. البر اللى هحس فيه انى مش تايهة أخيراً !
- أنتى مخك بيسف على فكرة !
= مش فاهمة ؟!
- مخك بيسف ، وبترهقى نفسك.. بترهقى نفسك نفسياً وعقلياً على الفاضى ، خفى على نفسك شوية.. أنتى بتفتحى سكك للآكتئاب مش هتعرفي تقفليها فى نفسك !
انتى سايبة نفسك لأفكار سودا بتآكل في روحك والنتيجة الحتمية لكل اللى انتى بتعمليه ده ان اسلاك مخك هتفرقع وهتحسي انك أخدتى كفايتك من الدنيا ومش عايزة منها زيادة سواء حلو او وحش ! صح ؟!
- صح !
= طيب ، بصى مش هقدر أقولك ان فى علاج سحرى للمأساويات اللى بنقابلها فى حياتنا ولا حتى فى طريقة تبعدهم عننا للأبد ، لكن في  تفاصيل بسيطة بتخلى المأساويات تعدى.. يعنى يوم يمر خفيف على القلب ، او ضحكة حلوة تسمعيها وتضحكى على حسها او حاجة حلوة تحصل بطريقة غير متوقعة فـ تفرحك جدا ، ربنا مسيره يبعت الضي اللى هينور الطريق ، انا متأكد ! وعارفة ايه اهم حاجة لازم تحطيها فى بالك وتبروزيها ؟!
- ايه ؟!
= انا هفضل معاكي طول الطريق ، ربنا بعت لنا النور كان بها ، مجاش مش مشكلة خالص ، أدينا تايهين سوا..

- المشهد الثانى - 


" افتقدك قبل أن تبعدي.. مجرد وجودك يخفف عني ما أحمله،

 فالحياة أصبحت أقسي من المفترض"

- انتي عارفة ان عمري ماحكيت لحد من اصحابي الحكاية كاملة؟! 
= حكاية ايه؟! 
- أي حكاية! دايما كان في تفاصيل بتقع مني سواء بالقصد او غصب عني.. وساعات كتير كنت بتفهم غلط.. إلا معاكِ أنتي! انتي بتفهمي الحكاية كلها بالتفاصيل اللي انا سكت عنها! بتفهميني بطريقة مرعبة.. 
= يعني انا بخوفك! 
- بالعكس أنتي بتطمنيني جدا! مجرد وجودك لوحده بيطمنى من غير حتى ما تتكلمى.. عارفة ايه أكتر حاجة بحبها فيكى فعلاً ؟!
= ايه ؟!

- إنى ممكن أجى أقعد معاكي وأسند راسي علي كتفك وأفضل ساكتة مبتكلمش ولا أنتى حتى تسأليني ، ومع ذلك أرتاح.. كأنى حكيت كل اللى عندى وزيادة كمان ! 


- المشهد الثالث -


" وذلك الجزء الأسود بقلبي ، كان أبيض اللون.. وأنا كنت بخير بدونك" 

- وحشتيني.. 
= ماشي! 
-!! 
= تفتكر انا فعلاً رجعت ليك عشان انتقم منك؟! 
- معتقدتش.. مش انتي اللي تعملي حاجة زي كده! 
= بس انا مش مسامحَك.. 
- وانا بحبك.. 
= وانا كمان بحبك، بس مبقتش واثقة فيك زي زمان ولا مطمنة بوجودك! 
- طالما انتي بتحبيني وانا بحبك، كل حاجة ممكن تتحل.. 
= لأ مش كل حاجة بتتحل بالحب! وفي حالتنا دي بالذات الحب مش كفاية.. 
- يعني ايه؟! 
= يعني انا فعلاً مش قادرة أسامحك، وساعات كتير  بتمني تتحط في نفس الموقف الأسود اللي انت حطتني فيه، عشان بس تحس وتعرف انا اتوجعت ولسه بتوجع اد ايه..
- انا مش ناوي اخسرك، ومش هعرف أكمل ولا أعيش من غيرك.. انا بحبك! 
= وانا ما أنكرتش الحب ده، ولا ادعيت عدم وجوده! بس أنا مبقش حساه زى زمان شئ ملموس وواضح ، زمان كنت مطمنة بيك من غير ما أسمع منك كلمة "بحبك" لكن دلوقتى أنا مش مطمنة ومش عارفة حتى المفروض أطمن إزاى ؟! وبعدين يابني انت بتكرهه نفسك اصلا، هتحب مين بقي وانت حتي نفسك مش عارف تحبها؟! احنا اللي بينا مات من زمان واللي بيحصل دلوقتي بيني وبينك ده مجرد حلاوة روح.. من فضلك سيبني انساك بهدوء وارجع لنفسي تاني! 


تعليقات

  1. كلام محترم نابع عن تفكير و وعى كامل بالواقع...عايز احيكى على دماغك النضيفه

    ردحذف
  2. كلام محترم نابع عن تفكير و وعى كامل بالواقع...عايز احيكى على دماغك النضيفه

    ردحذف

إرسال تعليق

المشاركات الشائعة من هذه المدونة

كيف ‏بدأت ‏نوبات ‏القلق

- بداية الـ anxiety disorder معايا كانت تقريباً من 2010 .. كنت لسه في الجامعة وبدأت أدخل في دوامة اكتئاب بسيطة سببتلي أرق بشع ( كنت بنام ساعتين في اليوم مثلاً) وانعدام الرغبة في الأكل. - في أواخر 2012 الـ anxiety بدأ يسببلي مشاكل واضحة في المعدة، وبقي سهل جداً لو توترت زيادة عن اللزوم اجيب كل اللي اكلته! ووقتها وزني نزل من 87 لـ 77 في فترة أقل من شهر! - في 2015 عرفت الـ Panic attack لأول مرة. جاتلي في الشغل! والشهادة لله دي كانت أعنف مرة. بدأت بعياط هادي وبعدها ضيق تنفس ثم انخفاض حرارة الجسم مع رعشة ثم رؤية ضبابية بالكامل ودوخة مع زيادة ضيق التنفس! افتكرت يومها اني هموت خلاص. وعشان افوق منها اخدت وقت وباقي اليوم كنت مرهقة جداً ونفسي تقيل. - في 2018 مشاكل الأرق بدأت ترجع وقررت احاربها بممارسة الرياضة 3 ساعات على الأقل يومياً. كنت بخلص شغل، اروح الجيم، اروح البيت اخد شاور وانام! وده بالنسبالي كان يوم عظمة! -من 2019 وطبعاً خلال 2020 بعاني بشكل شبه يومي مع الـ anxiety وال Panic attack واوقات كتير أساليبي في محاربتهم بتفشل وبستسلم للنوبات! - رحلة 10 سنين تقريباً مع "الكلاب السعرانة الل...

من شرفة القمر إلى دهاليز العقل

أتأمل البدر المكتمل من مقعدي الخلفي في السيارة، أتابعه طوال الطريق وهو يمرّ من وسط الغيوم إلى السماء الصافية، وهكذا دواليك. أتابعه ببلاهة طفلٍ في الرابعة من عمره، يظن فرِحًا أن القمر يتبعه أينما ذهب تربطني بالقمر علاقة لا أفهمها كثيرًا، لكني أحبها. أعشق مشاهدة البدر، ويمكنني أن أحدق فيه لساعات دون ملل. وعلى الرغم من معرفتي بأن القمر لا يسير معي حقًا، إلا أنني أنزعج كثيرًا حين تحجبه الأبراج والعمارات العالية عني فجأة! أكره القاهرة في معظم الأوقات لأسباب عديدة، وربما كانت هذه من أبرزها . على مدار أعوام، كان القمر صديقي الوحيد، لا يملُّ منّي.  أنا صاحبة العقل الذي لا يهدأ ولا ينام. أحدثه كثيرًا، وأصمت أكثر عندما تتداخل الأفكار في رأسي، وتغمرني مشاعر متناقضة لا أستطيع التعبير عنها . تعلمت مؤخرًا دعاءً أكرره يوميًا: "اللهم اصرف عني شتات الأمر والعقل والتفكير". أتمسك به كلما عدت من شرود طويل بين مئات الأفكار والتساؤلات . مؤخرًا، وصفني أحدهم بأنني هادئة. وقالت لي أخرى إن والدتها تتمنى ابنة مطيعة مثلي! أثار الأمر دهشتي لوهلة، ومرَّ أمام عيني شريط طويل من المواقف - بطول سنواتي الأرب...

في وصف حالة "علي ما يبدو وتقريباً كده" !

ولأننا مش واثقين في حاجة/حد بشكل كامل فـ بتفضل تعاملاتنا كلها بين قوسين اسمه " تقريباً او Almost" فـ نكررها أكتر من مرة في وسط كل جملة بنقولها ! فأقولك إني تقريباً قربت أوصل للبيت، وتقريباً كده أنا أتغيرت .. وإني تقريباً بتضايق لما يتقال ولو بالهزار إني "مسترجلة" مع أنها حقيقة مقدرش أنكرها! او إني تقريباً مبعرفش أعبر عن اللي جوايا صح غير بالكتابة! و إني تقريباً كده انا لسه بحبك وفكراك!  و أني كنت تقريباً بشم ريحة اللي بحبهم لما يطول غيابهم عني، لكني تقريباً فقدت حاسة الشم !  وأني ساعات ببقي تقريباً مبسوطة وراضية بكل تفصيله في حياتي لدرجة إني مبفهمش هو أنا كنت متضايقة ليه؟!  وإن تقريباً اللون الأزرق لوني المفضل او يمكن الرمادى، فعلاً معرفش! او إني تقريباً بحب الـ random photos اللي بتكون علي ألبوم الموبايل وبسرح فيها بالساعات وإن تقريباً نفس الصور اللي  بتضحكنى بتسبب لي حزن كبير!  "تقريباُ" عند اللي زي مش مجرد كلمة كده والسلام ، هى أقرب مايكون لـ وصف حالة بنعيشها ! وصف لـ خط النص، مابين القرب او البعد الكامل!  it's " Almost "  but not...