التخطي إلى المحتوى الرئيسي

يوميات الحزن العادي..



"من إين يأتيك الحزن..؟! من مسام جلدى" 

محدش عارف امتى ولا ازاى بيهاجمك حزنك؟! والمشكلة دايما فى موضوع الحزن انه بيلم .. يعنى وهو جاي فى سكته بيعدى على احزانك كلها واحدة واحدة ويجبهم فى سكته.. ولأنه عشرى جدا ، عادة لما بيجي مبيروحش بيسهولة !
قرفت من الدنيا كلها وقررت انعزل فجأة.. لأ هى مش فجأة اوى الصراحة ، انا بقالى فترة كبيرة بقاوح فى نفسي وفي الناس اللى حواليا ! ومش عارفة كنت بقاوح ليه ولا علي ايه ! يعنى مثلا كنت طمعانة حد يحس ويطبطب لاسمح الله ! ولا كنت مراهنة نفسي انى مع المقواحة واقناع روحي انه كله كويس وكله فل.. هبقى فلة فعلاً ! 
ماشي يافلة.. عموماً يعنى لا ده حصل ولا ده حصل ! وغرقت فى انا فى حزنى وفى اكتئابى.. وقفلت عليا كل الدواير ! مش عايزة حد ولا عايزة حد يعوزنى !



"الحزن ياصديقى هو أن لا تجد أحداً لتخبره بحزنك" 

من فترة قريبة قبل م اغرق فى حالة الاكتئاب بالكامل كنت بتكلم مع سمر.. *كنا قاعدين ساعتها فى سينابون بنخمس سوا فى واحدة سينابون كبيرة وايس كريم وبحط انا الاتنين على بعض وبخرف كـ عادتى دايماً* قولتها عارفة انا لما بتعب مبقولش ليه ؟! مش لقلة الصحاب لا سمح الله بالعكس أكتر منهم مفيش ! بس لأنى عارفة رد فعل كل واحد فيهم لما هحكي.. عارفة بالملى وبالحرف وخصوصاً رد فعل الاقرب منهم ليا ! وده بقى حزن الحزن كله زى م بيقولوا ! ومش دى المأساة.. انا قادرة اتعامل مع مشاكلى بنفسي من غير ما احتاج حد ، "مشاكلى_بكل بساطة_انا حلها"
المأساة الحقيقة من موقعى حالياً انى بتفرج ، بتفرج على اللى بيحاول واللى مبيحاولش واللى بيقدم خطوة ويرجع خطوتين ، واللى اكتفى بالنظر من بعيد ثم طار ، واللى مش شايف اصلا ان فيا حاجة علشان يتعامل ! والنتايج بقى مبهرة ! مبهرة جداً جداً مع تحفظى على فكرة انى عارفة وانى متوقعة ده ! بس بالذمة مش مأساة ان مفيش نفر واحد حتى كسر التابو وفجأنى برد فعل معرفوش ! ياجدعان حاولوا تبقوا كريتف ! طب والله حرام ، لأ بجد حرام.. ده أكونت الساوند كلاود طلع احسن من تلات تربعكم والله !


"أصغر منى بس ساعات بتحسسينى أنك أمى" كل مرة تشوفنى وانا بدخن تتشال وتتهبد وتزعقلى.. نظرة عينها اللى مليانة خوف حقيقى عليا هى اللى بتخلينى ابطل فعلاً ، او عالأقل مشربش قدامها أحترماً ليها ! انا مبصدقش اى حد عموماً بسهولة.. بس نهلة مينفعش مصدقهاش!" 

طب هو ليه بعد ما بتغرق فى اكتئابك ، الناس من حواليك بتبدى تمد ايديها وكده ؟! ليه مش موجودين من قبل؟! ليه محاولش حد فيهم انه يمنع إكتئابك من بابه ؟! او حتى يخلوك متوصلش لمرحلة الغرق ؟! 
فاكرة انه من مدة كده واحدة من اصحابي كانت مكتئبة جدا ، وكانت بتفكر جديأ فى الانتحار ، الفكرة لوحدها جننتى جداً وحسيت بالذنب ناحيتها رغم انى مش من اصحابها القريبين.. بس كان لازم ساعتها اطمن عليها ولو من بعيد لبعيد واعرف انها بخير ، ولما الوقت ده عدى بيها وبقت بخير.. أكتشفت أنى مكنتش بعمل كده علشانها ، انا كنت بعمل كده علشانى أنا ! اه علشانى انا ، انا اللى هموت بأحساس الذنب لو كان جرالها حاجة وانا عارفة ان أكيد كان ممكن اعمل اى حاجة تساعدها تعدى اللى هى فيه بس معملتش !



"وكن انت من حيث تكون وأحمل عبء قلبك وحدك"

مبدئيأ كده كلمة "مالك" او"ايه الاخبار؟" او"أنتى كويسة" او "مختفية ليه؟" كلهم حرام ، حرام لأنى بقعد ادور على الاجابة فى كل ركن فيا ومبعرفش اطلع بحاجة ! ومش عايزة يكون ردى "ماليش"
وكلمة أخيرة جدا.. التعامل بطريقة قدم خطوة وارجع خطوتين،  شئ مؤذى جدا ومرهق جدا وانا عادة بكره الحلول الوسط جدا جدا ! 

تعليقات

المشاركات الشائعة من هذه المدونة

كيف ‏بدأت ‏نوبات ‏القلق

- بداية الـ anxiety disorder معايا كانت تقريباً من 2010 .. كنت لسه في الجامعة وبدأت أدخل في دوامة اكتئاب بسيطة سببتلي أرق بشع ( كنت بنام ساعتين في اليوم مثلاً) وانعدام الرغبة في الأكل. - في أواخر 2012 الـ anxiety بدأ يسببلي مشاكل واضحة في المعدة، وبقي سهل جداً لو توترت زيادة عن اللزوم اجيب كل اللي اكلته! ووقتها وزني نزل من 87 لـ 77 في فترة أقل من شهر! - في 2015 عرفت الـ Panic attack لأول مرة. جاتلي في الشغل! والشهادة لله دي كانت أعنف مرة. بدأت بعياط هادي وبعدها ضيق تنفس ثم انخفاض حرارة الجسم مع رعشة ثم رؤية ضبابية بالكامل ودوخة مع زيادة ضيق التنفس! افتكرت يومها اني هموت خلاص. وعشان افوق منها اخدت وقت وباقي اليوم كنت مرهقة جداً ونفسي تقيل. - في 2018 مشاكل الأرق بدأت ترجع وقررت احاربها بممارسة الرياضة 3 ساعات على الأقل يومياً. كنت بخلص شغل، اروح الجيم، اروح البيت اخد شاور وانام! وده بالنسبالي كان يوم عظمة! -من 2019 وطبعاً خلال 2020 بعاني بشكل شبه يومي مع الـ anxiety وال Panic attack واوقات كتير أساليبي في محاربتهم بتفشل وبستسلم للنوبات! - رحلة 10 سنين تقريباً مع "الكلاب السعرانة الل...

من شرفة القمر إلى دهاليز العقل

أتأمل البدر المكتمل من مقعدي الخلفي في السيارة، أتابعه طوال الطريق وهو يمرّ من وسط الغيوم إلى السماء الصافية، وهكذا دواليك. أتابعه ببلاهة طفلٍ في الرابعة من عمره، يظن فرِحًا أن القمر يتبعه أينما ذهب تربطني بالقمر علاقة لا أفهمها كثيرًا، لكني أحبها. أعشق مشاهدة البدر، ويمكنني أن أحدق فيه لساعات دون ملل. وعلى الرغم من معرفتي بأن القمر لا يسير معي حقًا، إلا أنني أنزعج كثيرًا حين تحجبه الأبراج والعمارات العالية عني فجأة! أكره القاهرة في معظم الأوقات لأسباب عديدة، وربما كانت هذه من أبرزها . على مدار أعوام، كان القمر صديقي الوحيد، لا يملُّ منّي.  أنا صاحبة العقل الذي لا يهدأ ولا ينام. أحدثه كثيرًا، وأصمت أكثر عندما تتداخل الأفكار في رأسي، وتغمرني مشاعر متناقضة لا أستطيع التعبير عنها . تعلمت مؤخرًا دعاءً أكرره يوميًا: "اللهم اصرف عني شتات الأمر والعقل والتفكير". أتمسك به كلما عدت من شرود طويل بين مئات الأفكار والتساؤلات . مؤخرًا، وصفني أحدهم بأنني هادئة. وقالت لي أخرى إن والدتها تتمنى ابنة مطيعة مثلي! أثار الأمر دهشتي لوهلة، ومرَّ أمام عيني شريط طويل من المواقف - بطول سنواتي الأرب...

في وصف حالة "علي ما يبدو وتقريباً كده" !

ولأننا مش واثقين في حاجة/حد بشكل كامل فـ بتفضل تعاملاتنا كلها بين قوسين اسمه " تقريباً او Almost" فـ نكررها أكتر من مرة في وسط كل جملة بنقولها ! فأقولك إني تقريباً قربت أوصل للبيت، وتقريباً كده أنا أتغيرت .. وإني تقريباً بتضايق لما يتقال ولو بالهزار إني "مسترجلة" مع أنها حقيقة مقدرش أنكرها! او إني تقريباً مبعرفش أعبر عن اللي جوايا صح غير بالكتابة! و إني تقريباً كده انا لسه بحبك وفكراك!  و أني كنت تقريباً بشم ريحة اللي بحبهم لما يطول غيابهم عني، لكني تقريباً فقدت حاسة الشم !  وأني ساعات ببقي تقريباً مبسوطة وراضية بكل تفصيله في حياتي لدرجة إني مبفهمش هو أنا كنت متضايقة ليه؟!  وإن تقريباً اللون الأزرق لوني المفضل او يمكن الرمادى، فعلاً معرفش! او إني تقريباً بحب الـ random photos اللي بتكون علي ألبوم الموبايل وبسرح فيها بالساعات وإن تقريباً نفس الصور اللي  بتضحكنى بتسبب لي حزن كبير!  "تقريباُ" عند اللي زي مش مجرد كلمة كده والسلام ، هى أقرب مايكون لـ وصف حالة بنعيشها ! وصف لـ خط النص، مابين القرب او البعد الكامل!  it's " Almost "  but not...