بين منطوق لم يقصد..ومقصود لم ينطق..

كل كلمة قولتها ومقصدتهاش وكل قصد تاه في وسط توضيحات كتيرة وفي الاخر المغزي برضك موصلش.. او اللي قدامي مسمعش.. 

كل تراك مزيكا شدني من العالم وسحبني في عالم تاني افتراضي ارتحت فيه ففضلت اعيد وازيد في نفس التراك يمكن الحالة تطول ومتتقطعش.. 

كل دمعة وقفت علي نن العين لا عارفة ترجع ولا قادرة تصارح نفسها بالوجع فتشد في سكتها باقي الدموع وتبدء وصلة أنين وفقد طويلة يمكن ارتاح بعدها.. 

كل جرح كان متغطي أكمني بعرف الهي نفسي كويس في دوامات كتير.. دوامة شغل، دوامة مذاكرة، دوامة نوم....الخ 

كل خيبة وانكسار اخدت مني حته.. وحته ورا حته، فبقيت مجموعة حتت ملهاش علاقة ببعض.. ساعة مبسوطة ومزاجي رايق جدا وساعة مش طايقة حد في السما ولا في الأرض!

كل سكة مشيت فيها وانا معاندة قلبي فى رهان علي النهاية السعيدة.. ولجل الفقر وزيادة وجع القلب تنتهي السكة برهان كسبان لقلب مكسور علي نهاية كان عارفها من اول خطوة.. 

كل شخصية في حياتي حبيتها زيادة عن اللزوم واتعلقت بيها وبتفاصيلها.. وراحت وسبتلي التفاصيل اعيش انا جواها ومعرفش اخرج منها ! 

كل حاجه/حد اتكلمت عليها كتير من كتر شغفي وحبي ليها/ليه ومع الوقت بقي الكلام ماسخ ومتكرر واتبقي من الشعور نفسه ذكريات البدايات، احنلها وتحنلي!

كل احساس بالحب والاشتياق اتحول من احساس رايح جاي لاحساس من طرف واحد فدبلت جواه الروح وقلبت لتبلد واعتياد.. 

كل حلم مسكت في تفاصيله وانا بفتح عيني من كتر حلاوته وخوفي ليهرب .. وكل كابوس كرهني في النوم ! 

كل وصف اتوصفت بيه (انانية- مغرورة - مسترجلة- مترددة - تايهة - عصبية - موهوبة - غريبة - قاسية.. الخ) انا شايفه نفسي صح ولا انتوا اللي صح؟! ولا احنا الاتنين غلط وانا الحقيقة مختفية واللي معاكم دي مجرد رد فعل!

مابين الكلام والسكوت.. مابين الضحكة والبكا.. مابين النوم وحلم اليقظة وبين الفوقان.. مابين عكرة المزاج وحالة الروقان.. مابين انبساط عضلات وشك وانقباضها في الزعل.. مابين اقصي اليمين واقصي الشمال.. مابين فص دماغك الايمن والفص الأيسر.. تلك الشعرة بين ماتراه حق وما تراه باطل! انت تائه بالكامل وليس بيدك سلاح سوي الأمل.. وبدونه ستموت!