- كنت بتفرج النهاردة على حلقة جديدة من مسلسلى المفضل " Gray's anatomy " ♥ الحلقة اتختمت بكلمتين على لسان البطلة وهى بتقول لجوزها بكل وضوح انها تقدر تعيش من غيره .. بس هى مش عايزة ده ولا عمرها فكرت فى كده حتى ! والفكرة هنا هو احنا اللى بنكتف نفسنا بالمشاعر ولا المشاعر هى اللى بتكتفنا ؟!
احيانا كل واحد فينا بيحتاج من اللى قدامه كلمة فى الوقت المناسب تخليه يمسك فيه فى عز ما كل الاسباب والدوافع والدنيا كلها بتقوله سيبه وكمل وحياتك هتكمل عادى واغلب الظن حياتك ساعتها هتمشى عادى.. بس عارف ايه الكارثة هنا ان اللى قدامك ميقولش حاجة او يفتكرك فعلاً مبقتش مهتم فيستخسر فيك وفيه الكلمة اللى ممكن ترجعك عن اول خطوة فى الفراق ..!
- ايام الجامعة كان معايا بنوتة صحبتى ، لأ هى مكنتش صحبتى بس هى كانت حاجات كتير فى بعض كده.. هى اول واحدة عرفت مواصفات فتى احلامى _ ده اذا كان فيه فتى احلام اصلا_ وهى اكتر واحدة شربت معاها عصير قصب فى الدنيا ، واكتر واحدة اخدت معاها ذنوب من كتر ماكنا بنقعد عالسقطة واللقطة فى الجامعة للى رايح والجاي ، هى اللى خلتنى اسمع فرقة Evanescence واحبها ، وتقريبا هى اكتر حد فى الدنيا انا فرحتله يوم م اتخطبت واتجوزت ومن ثم بقت أم ♥.. فاكرة يا رفيقة الصفحة اللى فى كتاب مقرر الشعر اللى كل واحد فينا كان كاتب فيها للتانى notes عن المحاضرة اللى مكناش مركزين فيها ولا فاهمين منها كلمة بس حضرناها للآخر ! طب فاكرة جلسات السف اللى كنا بنعملها سوا ، ولا ايام مشروع التخرج اللى كان عن الثورة واخد مننا رقات ! فاكرة تذاكر المترو اللى كنا بنكتب عليها لبعض تفاصيل من اليوم علشان نرجع نقراها ونفتكر ايه اللى حصل ونضحك !!
وحشتينى جدا.. وحشتنى النسخة دى منك.. معرفش إحنا فين من حياة بعض دلوقتى ، ولا حتى عارفة إحنا بعدنا كتير عن بعض إزاى وأمتى ؟! بس آخر مرة شوفتك فهمتنى ان الوقت ياصديقتى عدى بيا وبيكى سنتين مضروبين فى نفسهم يجي خمستلاف مرة فلا أنا بقيت عارفة أنتى مين دلوقتى ولا أنتى عارفانى ! انا حقيقي آسفة !
- ضيعت من عمرك سنة ويمكن أكتر بتحب فى "فوضى" هى عبارة عن كتلة فوضى ماشية على الأرض ، بتلعب بيك.. بتعلقك بحبال الهوى الدايبة.. بتسيبك وهى عارفة انك هترجع لأنك بتحبها ، انت عارف انها مبتحبش تضيع وقتها ، وهى من كتر خوفها من الوقت بتلعب بيه وبيلعب بيها..! هى حتى معندهاش الجرأة الكافية أنها تسيبك وتحط اخر نقطة فى علاقتكم سوا يمكن تعرف تلاقى حد فعلاً يحبك بجد ، هى سايباك كده يمكن تمل او تزهق من نفسك وتقرر تبعد وتكفيها شر احساسها بأنها كسرت قلبك ومقدرتش احساسك .. هى متنفعكش بس انت مش قادر تفهم ده ، هى كتلة فوضى ماشية على الأرض بتحاول تلاقى طريقها بأعجوبة.. !
تعليقات
إرسال تعليق