مش مكسور !

انا قلبى مش مكسور..انا قلبى متعضعض !

وبيجننى..يقع ويقوم..تقولش متعفرت !

تسكنه الهموم اوقات..وبرضه يقول عادى!

يسرح فى الذكريات وتريحه براءة الماضى..

اد ايه كنا ملايكة..ومكنش فينا ذرة غل..!

كانت روحنا صافية..منرضاش لـ بعض الذل..

لا كنا بنشيل من بعض..ولابنقف لـ بعض عـ الوحدة..

وبتلمنا القعدة الحلوة..والأكلة الواحدة..

ودلوقتى لما بنشوف بعض..مين فينا مـ بيحسش بـالوحدة!

كبرنا واتغيرنا..واتغيرت كل حاجة فينا..

اللى فضل منـا بس هو اسامينا..

حتى احلامنا اللى عشنا عـلى نورها ايامنا وهونت علينا كتير..

اختفت..فين معرفش؟!..يمكن قتلها كتـر التفكير..!

بقيت حاسس انى عايـش كده..مليش مزاج اصحى ولا حتى انام !

لا الواقع مريح..ولا عاد فـى لزمة للأحلام..!

وكأن حياتى مركونة عـ الرف ومستنية اللى ينزلها ويعيشها..

بس يكون حد غيرى..!!

حد عنده قلب جديد..وضمير غير ضميرى!

حتى المشاعر اللى كانت محسسانى ان لسه فيا روح..

قدرت تروح منى وتسبنى فـ حالة تبلد كاملة..!!

هو فعلا فـى حاجة تستاهل نبكى عليها ولو مجاملة ؟!

الناس اصلا مبتقدرش..انا نفسى ناكر للجميل..

مش هتكسف واقول عن نفسى طيب وملاك..

بالعكس انا عيوبى كتير..وعندى شيطانى..!!

وصدقنى لما بيوسوس بكون فـعلا شرير..!

وبعيدا عـن التبرير..

شوف مين فـ الدنيا بقيلك..

مين راعى فيك العشرة وحل محل ضميرك!

وشالك عـ راسه..واستحملك فـ عز م كنت مش طايق حتى هدومك..!!

مين اللى ساعدك وخد بيدك..وكان على خطاك..يومه يومـكـ..!

ومين اللى خلق دايرة العذاب حواليك وكان سبب همومك..!!

مين اللى كان وكنتلـه اقربلك من حبل وريدك..

مين اللى هانت عليه عشرتـك..وبقى سهل عليه يسيبـكـ..

مين كان سبب دمعتك..برغم ان اسمه حبيبكـ..

ركز وشوف الخطوط ازاى بتتفرع وتتقسم قدامك..؟!

وازاى كمان قادرة تخش فـ بعضها..!

وتخلق معضلة..ولو جدع تعرف تحلها..!!

وان جيت تحكم على حد هـ تطلع كداب اول عن آخر..

لأنك مهما حكمت..مسيرنا بنتغير ف الآخر..!!

مفيش حد كله شر ومفيهوش ذرة خير..

ولا برضه فى حد هو ابو الاخلاق والضمير..وطلعته جناحات وخلاص هـيطير..!

اقولك ريح دماغك م التفكير..وعيش زى م انت شايفها صح..او حتى غلط..!

ربنا هو اللى بيحكم ويحاسب مش اى حد من البنى آدمين !