بتفرق كتير اوووى لما تلاقى حد جنبك وحاسس بيك..مش مهم يكون عارف حل لكل مشكلك..مش مهم يكون رائد تنمية بشرية علشان يقولك فين الصح وفين الغلط وتعمل ايه ومتعملش ايه..!!
لكن المهم بجد ان الانسان ده يكون فهمك اووى حاسك اووووى..موجوع زيك- ويمكن اكتر- بحالك..!!
مهم يبقى عارف امتى يخدك ف احضانه ويسيبك تتدفى وتحمى قلبك من برد الدنيا وجفاء المشاعر اللى حواليك..!!
ويبقى فاهم ان ضمة الحضن ديه بالدنيا كلها..وان اوقات ماسكة الايد والشد عليها بتقولك انا فعلا معاك..انا مش هسيبك..
انا موجوع بوجعك ومش هسيبك الا لما الضحكة ترجع تنور عنيك تانى..!!
مهم انه يكون عارف ان اوقات الكلام معاك والنصيحة مش هتكون ليها لازمة لانك وقتها بتبقى عارف كل النصايح دى بس مش عارف تفيد بيها نفسك..!!
مهم انه يكون قادر يشوف حزنك جوا عنيك حتى لو انت قاعد قدامه طول الوقت بتضحك وبتهزر..!!
مهم انه يفهم انك اوقات مش هتكون عايز تتكلم..او هتكون عايز تتكلم بس خايف تحمل اللى حواليك هم فوق همهم..!!
مهم انه يقولك انا مرايتك يااهبل..انا مرايتك اللى شايفه اللى جواك..
انا اللى حاسس بوجعك حتى وانت بتكلمنى على الشات ومش شايفك وعمال تبعتلى :) و :D !!!
مهم انه يعرفك انه طول الوقت هيكون هنا..كل م تحزن تخبط على قلبى وتلاقينى..هـ حزن معاك..!!
وكل ماتفرح..تعالى وانت بتضحـك اووى وفرحان جداااا..وانا هـ قوم ارقص 10 بلدى معاك..!!
محظوظ انت محظوظ اووووى لو فــ حياتك الحد ده..!!
حافظ عليه بأيدك وسنانك لانه هو ده بس النسخة الاصلية من الصديق الحقيقى..!!
الصديق اللى قرينا عنه كلنا ف دروس القراءة..!!
ولو مش عندك الحد ده..اقولك حاول انت تكون كده مع الناس اللى حواليك واكيد هتلاقى منهم اللى يعملك بنفس الطريقة ان مكنش احسن كمان..!!
تعليقات
إرسال تعليق