التخطي إلى المحتوى الرئيسي

تشوووووويش

عارف لما تبقى دايس فى حالة من التشوويش الفكرى ومش عارف تخرج منها خااالص..عارف لما تبقى كل التنافضات اللى فى حياتك تظهر فجأة وبدون سابق انذار..لما كل شعرة بين التناقض والتانى تتقطع..وتصبح كل حاجة شبه بعضها..هو ايه الحق؟؟وايه الظلم؟؟ايه الفرق بين العدل والمساواة؟؟وهو صحيح فى فرق بينهم؟؟مين الظالم؟؟ومين المظلوم؟؟وازاى انت ممكن تكون مشارك فى ظلم نفسك وظلم غيرك وانت طوول الوقت شايف انك استحالة تكون بتعمل كده؟؟..طب احنا بنطلب من اللى حوالينا يقولنا الحقيقة- حتى لو كانت الكذبة اللى احنا عايشين فيها مريحة جداا- ولما بنسمعها منه منرتحش بالعكس الطين بيزيد بلة..!!!طب ليه لما بنام ونحلم اننا حققنا احلامنا وطيارين بيها ونصحى ماليين امل وتفاؤل غريب..كأننا حققناها فعلا وعيشنها..ونفضل مكملين كده مع اننا لا حققنا حلم ولا نيلة..ولا حتى حطينا رجلينا على اول الطريق..!!!!ليه احيانا من كتر الفرح بنبكى كأننا مستكتريين على نفسنا الفرح والضحك..؟؟!! ليه احيانا ف عز الفرح مبنصدقش ان الفرح ده لينا مهما كان اللى حوالينا فرحان ومصدق..؟؟!!ليه ساعات بيملانا احساس اننا منستهلش..كأننا موزعين للارزاق؟؟!!ليييه هاه؟؟!!

ليه انا نفسى قاعدة بكتب الكلام اللى مش مفهوم ده..ومش مصدقه ان ف حد ممكن يقراه ويفهمه اصلاااا...لأ ومع ذلك بكتب برضه..!!! مليانة قلق..مليانة حيرة..مليانة اسئلة ولاجدع امتحان او انترفيوو فى شركة مالتى ناشيونال..!! والطالب اللى بيحل فااااشل جدااا ومش عارف اجابة ولا سؤال..وبيرد على كل سؤال بسؤال..انا تعبانة..ااااه عادى وايه يعنى مش اول مرة..مخى هيفرقع ومليان اسئلة من اتفه مايمكن..واسئلة تخينة كده ومكلكعة وبنت تيييييت..الاعتراف بالحق فضيلة..!!!
اللى قال ان الحياة سهلة..هو حاجة من الاتنين اما بنى ادم غبى..او مقطوع من شجرة وملوش حد خاااالص..يعنى عايش كده مع نفسه..وبرضه معتقدتش وقتها انه هيكون مرتاح..لاننا بطبعنا بنحب اللمة..الانطوائى ده اغلب الوقت بيكون مريض..
الحياة مش سهلة والا مكنش حد غلب..!!اوقات بحس انه مفيش فايدة..وان الملل والروتين ده مش هينتهى..بس الحقيقة بتقول ان مفيش حاجة بتفضل على حالها..وان الدنيا بتتغير واحنا كمان بنتغيير..!!!بس فى الى بيتغير بسرعة جدااا..وفى اللى بيمشى بمعدل عااادى جدااا..وفى اللى بيتغيير واحدة واحدة..

اوقات بقول لنفسى..وانا ليه تعبانى كده منبسطها احنا حبه..خلااااص هعيش بنظام 1+1=2 تمام جداا..يعنى هقول للى بحبه بحبك فى وشه..واللى بكرهه..هقوله بكره عالطوول برضه..اشطه جدااا..ومن غير مبرر كمان..انا لسه هوضح بلا هم..!!!
عملتها..ومشيت اوزع فالحب على حبايبى..ولطش بقى للكره ف اللى مش طايقاه..مرتاحة؟؟؟!!!!
لأ طبعاااااا..اللى وزعت عليهم حب الدنيا طلع منهم اللى مش بيحبنى اصلاااا ولا عيزنى فى حياتى وفى طبعا اللى كان مصلحة وبعدين اختفى..واللى لطشته كره كده لله فى لله لمجرد انى مش مرتاحة ليه..طلع محترم وابن ناس بس اسلوبه غلط أو انا مفهمتهوش صح..وبعدين ليه اصلااا اكره حد معمليش حاجة من الاصل..المهم طلعت عبيطة و1+1 مش بيساوى2 علشان كده اخترعوا الاله الحسابة المعقدة التنحة دى والرياضيات بقت علم يصعب على امثالى فهمه..وهوب بقى فى قسمة وضرب وكسر عشرى وجذرى وفهمى ونظمى..لوووول..!!!
طب وبعدييين بقى..انا زهقت بجد..ارووح لربنا بقى مفيش احسن من كده..انتى اصلا تعبانة علشان بعيدة عنه..صح جدااااااا..اتوضيت صليت..ركعت وبكيييت..دعيت..طووولت الدعااااا..يااااااااااااارب بقى..خلاااص هتوكل على الله (ونعم بالله)..مرت الايام..حصلت حاجة يابنتى؟؟ لأ مفيش برضه..!!!بس انتى شكلك اتحسنتى..صح؟؟!!هديتى شوية..مش كده..؟؟ااااه امال ايه..انا فله شمعة منورة..

والايام لسه بتمر..ثوانى ف دقايق ف ساعات ف ايام ف اسابيع ف شهور ف سنين..الايام ماشية حبه بالزق..انزل ازق فى نفسى يمكن اللى عايزاه يجى لوحده..!!!(مهى دى اخرتها)
وتمشى الايام فجأة جرى..وارجع ابص كده ع الايام اللى طااارت..الاقيها فاضية..فاااااضية خاااالص..مشيت كده..كده وخلااااص..طب من بكره هبدأ من جديد..هقوم واعمل اللى نفسى فيه..!!!(بتهزررى صح)
لو مستنية كل حاجة تيجى لوحدها يبقى مفيش حاجة هتيجى ابداااا لوحدها..ولو نزلت ف الدنيا كده وقضيتها تلطيش يمين وشمال وانت مش شايف ايه اخره اللى بتعمله برضه الحوار هيفكس تماما..!!! الحظ مش هيخبط على بابك فجأة كده..اه ربنا قادر على كل شئ بس مش كده..انت مش ساحر..والموضع نفسه بيخرج من ايدى حاليااااا..
بس علشان اختم دلوقتى كان فى قاعدة من 5 سطور غريبة شوية ومش فاهمة برضه ايه علاقتها باللى كتبته بس هقولها ورزقى ع الله
1-الفلوس متشتريش السعادة..اساسى..بس هيبقى لطيف ان تعيط جوا سيارتك المرسيدس او الB.M.W احسن متعيط فى المواصلات..
2-سامح اى حد غلط ف حقك..بس ايااااك تنسى اسم ابن الكلب اللى عملها فيك..
3-ساعد اى حد بتواجه مشكله..وهو هيساعدك لما تكون انت كمان فى مشكلة..
4-كتيييير من الناس عايشين بس لاننا هنتلطش اعدام لو قتلتناهم..
5-المخدرات مبتحلش المشاكل..وبرضه شرب اللبن مبيحلهااااش..
لو مفهمتنيش..مفيش مشكله خاااااااااالص..انا شخصيا اوقات كتير مبفهمش نفسى..!!
والسلام عليكم ورحمة الله وبركاته..




تعليقات

المشاركات الشائعة من هذه المدونة

كيف ‏بدأت ‏نوبات ‏القلق

- بداية الـ anxiety disorder معايا كانت تقريباً من 2010 .. كنت لسه في الجامعة وبدأت أدخل في دوامة اكتئاب بسيطة سببتلي أرق بشع ( كنت بنام ساعتين في اليوم مثلاً) وانعدام الرغبة في الأكل. - في أواخر 2012 الـ anxiety بدأ يسببلي مشاكل واضحة في المعدة، وبقي سهل جداً لو توترت زيادة عن اللزوم اجيب كل اللي اكلته! ووقتها وزني نزل من 87 لـ 77 في فترة أقل من شهر! - في 2015 عرفت الـ Panic attack لأول مرة. جاتلي في الشغل! والشهادة لله دي كانت أعنف مرة. بدأت بعياط هادي وبعدها ضيق تنفس ثم انخفاض حرارة الجسم مع رعشة ثم رؤية ضبابية بالكامل ودوخة مع زيادة ضيق التنفس! افتكرت يومها اني هموت خلاص. وعشان افوق منها اخدت وقت وباقي اليوم كنت مرهقة جداً ونفسي تقيل. - في 2018 مشاكل الأرق بدأت ترجع وقررت احاربها بممارسة الرياضة 3 ساعات على الأقل يومياً. كنت بخلص شغل، اروح الجيم، اروح البيت اخد شاور وانام! وده بالنسبالي كان يوم عظمة! -من 2019 وطبعاً خلال 2020 بعاني بشكل شبه يومي مع الـ anxiety وال Panic attack واوقات كتير أساليبي في محاربتهم بتفشل وبستسلم للنوبات! - رحلة 10 سنين تقريباً مع "الكلاب السعرانة الل...

من شرفة القمر إلى دهاليز العقل

أتأمل البدر المكتمل من مقعدي الخلفي في السيارة، أتابعه طوال الطريق وهو يمرّ من وسط الغيوم إلى السماء الصافية، وهكذا دواليك. أتابعه ببلاهة طفلٍ في الرابعة من عمره، يظن فرِحًا أن القمر يتبعه أينما ذهب تربطني بالقمر علاقة لا أفهمها كثيرًا، لكني أحبها. أعشق مشاهدة البدر، ويمكنني أن أحدق فيه لساعات دون ملل. وعلى الرغم من معرفتي بأن القمر لا يسير معي حقًا، إلا أنني أنزعج كثيرًا حين تحجبه الأبراج والعمارات العالية عني فجأة! أكره القاهرة في معظم الأوقات لأسباب عديدة، وربما كانت هذه من أبرزها . على مدار أعوام، كان القمر صديقي الوحيد، لا يملُّ منّي.  أنا صاحبة العقل الذي لا يهدأ ولا ينام. أحدثه كثيرًا، وأصمت أكثر عندما تتداخل الأفكار في رأسي، وتغمرني مشاعر متناقضة لا أستطيع التعبير عنها . تعلمت مؤخرًا دعاءً أكرره يوميًا: "اللهم اصرف عني شتات الأمر والعقل والتفكير". أتمسك به كلما عدت من شرود طويل بين مئات الأفكار والتساؤلات . مؤخرًا، وصفني أحدهم بأنني هادئة. وقالت لي أخرى إن والدتها تتمنى ابنة مطيعة مثلي! أثار الأمر دهشتي لوهلة، ومرَّ أمام عيني شريط طويل من المواقف - بطول سنواتي الأرب...

في وصف حالة "علي ما يبدو وتقريباً كده" !

ولأننا مش واثقين في حاجة/حد بشكل كامل فـ بتفضل تعاملاتنا كلها بين قوسين اسمه " تقريباً او Almost" فـ نكررها أكتر من مرة في وسط كل جملة بنقولها ! فأقولك إني تقريباً قربت أوصل للبيت، وتقريباً كده أنا أتغيرت .. وإني تقريباً بتضايق لما يتقال ولو بالهزار إني "مسترجلة" مع أنها حقيقة مقدرش أنكرها! او إني تقريباً مبعرفش أعبر عن اللي جوايا صح غير بالكتابة! و إني تقريباً كده انا لسه بحبك وفكراك!  و أني كنت تقريباً بشم ريحة اللي بحبهم لما يطول غيابهم عني، لكني تقريباً فقدت حاسة الشم !  وأني ساعات ببقي تقريباً مبسوطة وراضية بكل تفصيله في حياتي لدرجة إني مبفهمش هو أنا كنت متضايقة ليه؟!  وإن تقريباً اللون الأزرق لوني المفضل او يمكن الرمادى، فعلاً معرفش! او إني تقريباً بحب الـ random photos اللي بتكون علي ألبوم الموبايل وبسرح فيها بالساعات وإن تقريباً نفس الصور اللي  بتضحكنى بتسبب لي حزن كبير!  "تقريباُ" عند اللي زي مش مجرد كلمة كده والسلام ، هى أقرب مايكون لـ وصف حالة بنعيشها ! وصف لـ خط النص، مابين القرب او البعد الكامل!  it's " Almost "  but not...