التخطي إلى المحتوى الرئيسي

ايها المواطنون..نحن نفقد قدرتنا على الألش..(بتاريخ قديم)


البلد دى معدش ينفع معاها نألش او نهزر او نضحك على اللى بيحصل بدم شعبنا الخفيف اللى اخف منه مفيش فى العالم..لان اللى بيحصل فيها يتخطى حدود الشعب المسكين ع الألش..
لان السادة المسئولين فيها وصناع القرار والاعلامين والصحفين الاجلاء بعد ماسحبوا السجادة من تحت رجل الشعب فى كل حاجة قرارو وبالاجماع انهم يسحبوا منه كمان صفة الألش وبدل ماهما يعملوا العملة واحنا نألش عليها..بقوا بيعملوا العملة ويألشوا فى نفس الوقت.. ويصادف ان تأتى عملية حرمان الشعب من صفة الألش واحنا داخلين على ايام حر نااااااااار وكانت النكتة والضحكة والألشة هى الحاجة الوحيدة اللى بتخفف عن الشعب المسكين محنته وكمان بجبروتهم مش عايزين يسبوها لنا.. ياجودعان حراااااااااااااااااااام والله اللى بيحصل حرااااااااااااام مينفعش تهزروا معانا كشعب كده ده حتى هزاركم سخيف جدااااااااا ولا يحتمل والنكت بتاعتكم مسخة اووووووووووووى.. يعنى حرااااام اصحى من النوم الاقى سعد قرر يرشح نفسه للرياسة فألش عليها انا والناس واقول طب كويس هيحولها لشارع الهرم ومعا لجعل دينا لكل مواطن وببلاش بلا مرواح سينمات بقى وزحمة وتحرش وكده..وبعدها بيومين يرجع يغيير رايه..واقول عاااادى شكلها اصلا دعاية من السبكى لفيلم جديد بيعمله لسعد..ابص الاقى عمر سليمان رجع فى رأيه وقرر يرشح روحه هو كمان للرياسة (اووووووووووووووف)اصلا خلعنا الراجل علشان انت تمسكنا بداله..طب مابدل الثورة والمرمطة والناس اللى ماتت كنا رضينا بيك من الاول ع الاقل كانت الناس اللى ماتت فضلت عايشة بدل ماحنا حتى الان بنغنى يانجيب حقهم يانموت زيهم ومجبناش حاجة ولسه اللى بيموت بيموت..وكله كووم بقى وحبيب الملايين..ومعبود الجماهير.. والسياسى الدينى اللامع صاحب اعلى نسبة بوسترات فيكى ياجمهورية ده عمر دياب المسكين لما بتنزل بدعاية لأغنيه لا هو ولا تمورة بيعملوه كده ولا حتى شركة التوزيع بتعمل كده وكل ماتسأل حد بيعلق البوستر تقوله منين وبكام يقولك اجابة واحدة دى محبة فى شيخنا..طب ياسيدى انا بحب امى وابويا وعيلتى واصحابى اروح بقى اغرق شوارع مصر بوسترات ليهم ومحدش ليه عندى حاجة اصلها محبة..واحمد شفيق طبعا مش محتاج عليه اى كلام كفاية انه شفيق وانه قبل كده راح مؤتمر انتخابى راكب حصان.يعنى الراجل قايم بالواجب..ده طبعا غير هرتلة باقى المرشحين زى مرتضى منصور اللى عباره عن مخ انثى الخرتيت على جسم الماموث المنقرض..وهى حالة لاتصيب سوى1 كل 55 مليون مواطن وتزيد نسبة الاصابة بالمرض فى حال كون اسمه مرتضى منصور..ماعلينا..انا اللى عايزه اقوله بغض النظر عن كل الهرتلة اللى بنسمعها وبشوفها كل يوم من بنزين مش لاقينه ونرجع نلاقيه مرمى فى الصحرا على طريق الغردقة عاااااادى بقى او مثلا حوار قديم زى سفر الاميريكان وبعدين يطلعوا يقولك دى جريمة ومن المسئول عن سفرهم ويطلع المجلس العسكرى...الخ هرتلة وضحك ع الذقون واستغفال لشعب بحاله حكومته ومسئوليه فكرينه اهبل اووووى لدرجة انهم بيلعبوا قدام عنيهم اللعبة والشعب كله فاهمها وبرضه مفيش فايدة..كفاية لعب ياجودعان كفاية لعب ياعم المجلس كفاية لعب ياسادة يااخوان كفاية لعب ياعم الشاطر انت كمان كفاية لعب ياسيد عمرو موسى وياسيد ابواسماعيل كفاية لعب يااى مرشح او بتفكر تترشح الهى يصيبك دور برد رخم جداااا فى عز الحر لو فكرت تعملها..كفاية لعب لان فيه ناس غلابة جدااااااا كل امنيها فى الحياة تعيش مستورة..تعيش النهاردة.. والنهاردة بس يعدى على خير وبعدين تفكر فى بكرة..كفاية لعب لان الناس اللى محلتهاش غير مواشيها فى الصعيد مش حمل حمى قلاعية تأخدهم..والناس اللى ميكروباصتها وتاكسيها هى اللى بتاكلهم وعايشين على يوميتها مش حمل ازمة بنزين..كفاية لعب وتلزيق بوسترات محبة فى المرشح للرياسة وفى ناس مش لاقية تاكل فى حين ان تمن بوستر من البوسترات الكبيرة اللى بتنزل بطول المبنى ممكن يأكل اسر مش اسرة واحدة..كفاية لعب لان احنا مش عايزين اللى يلعب معانا ويستغفلنا ويلبسنا العمة..لان الشعب الغلبان ميستهلش بعد ماعمل الثورة وضحى فيها بخيره شبابه يسأل نفسه سؤال غتت وهو لماذا قمنا بالثورة؟؟؟!!

وده كان التاريخ 7‏/4‏/2012


الله يرحم كانت ايام تحفة..دلوقتى بقى عندنا مرسى..وهو الصراحة مكفينا الش وكوميكس ووووو..يلا ماعلينا..

تعليقات

المشاركات الشائعة من هذه المدونة

كيف ‏بدأت ‏نوبات ‏القلق

- بداية الـ anxiety disorder معايا كانت تقريباً من 2010 .. كنت لسه في الجامعة وبدأت أدخل في دوامة اكتئاب بسيطة سببتلي أرق بشع ( كنت بنام ساعتين في اليوم مثلاً) وانعدام الرغبة في الأكل. - في أواخر 2012 الـ anxiety بدأ يسببلي مشاكل واضحة في المعدة، وبقي سهل جداً لو توترت زيادة عن اللزوم اجيب كل اللي اكلته! ووقتها وزني نزل من 87 لـ 77 في فترة أقل من شهر! - في 2015 عرفت الـ Panic attack لأول مرة. جاتلي في الشغل! والشهادة لله دي كانت أعنف مرة. بدأت بعياط هادي وبعدها ضيق تنفس ثم انخفاض حرارة الجسم مع رعشة ثم رؤية ضبابية بالكامل ودوخة مع زيادة ضيق التنفس! افتكرت يومها اني هموت خلاص. وعشان افوق منها اخدت وقت وباقي اليوم كنت مرهقة جداً ونفسي تقيل. - في 2018 مشاكل الأرق بدأت ترجع وقررت احاربها بممارسة الرياضة 3 ساعات على الأقل يومياً. كنت بخلص شغل، اروح الجيم، اروح البيت اخد شاور وانام! وده بالنسبالي كان يوم عظمة! -من 2019 وطبعاً خلال 2020 بعاني بشكل شبه يومي مع الـ anxiety وال Panic attack واوقات كتير أساليبي في محاربتهم بتفشل وبستسلم للنوبات! - رحلة 10 سنين تقريباً مع "الكلاب السعرانة الل...

من شرفة القمر إلى دهاليز العقل

أتأمل البدر المكتمل من مقعدي الخلفي في السيارة، أتابعه طوال الطريق وهو يمرّ من وسط الغيوم إلى السماء الصافية، وهكذا دواليك. أتابعه ببلاهة طفلٍ في الرابعة من عمره، يظن فرِحًا أن القمر يتبعه أينما ذهب تربطني بالقمر علاقة لا أفهمها كثيرًا، لكني أحبها. أعشق مشاهدة البدر، ويمكنني أن أحدق فيه لساعات دون ملل. وعلى الرغم من معرفتي بأن القمر لا يسير معي حقًا، إلا أنني أنزعج كثيرًا حين تحجبه الأبراج والعمارات العالية عني فجأة! أكره القاهرة في معظم الأوقات لأسباب عديدة، وربما كانت هذه من أبرزها . على مدار أعوام، كان القمر صديقي الوحيد، لا يملُّ منّي.  أنا صاحبة العقل الذي لا يهدأ ولا ينام. أحدثه كثيرًا، وأصمت أكثر عندما تتداخل الأفكار في رأسي، وتغمرني مشاعر متناقضة لا أستطيع التعبير عنها . تعلمت مؤخرًا دعاءً أكرره يوميًا: "اللهم اصرف عني شتات الأمر والعقل والتفكير". أتمسك به كلما عدت من شرود طويل بين مئات الأفكار والتساؤلات . مؤخرًا، وصفني أحدهم بأنني هادئة. وقالت لي أخرى إن والدتها تتمنى ابنة مطيعة مثلي! أثار الأمر دهشتي لوهلة، ومرَّ أمام عيني شريط طويل من المواقف - بطول سنواتي الأرب...

في وصف حالة "علي ما يبدو وتقريباً كده" !

ولأننا مش واثقين في حاجة/حد بشكل كامل فـ بتفضل تعاملاتنا كلها بين قوسين اسمه " تقريباً او Almost" فـ نكررها أكتر من مرة في وسط كل جملة بنقولها ! فأقولك إني تقريباً قربت أوصل للبيت، وتقريباً كده أنا أتغيرت .. وإني تقريباً بتضايق لما يتقال ولو بالهزار إني "مسترجلة" مع أنها حقيقة مقدرش أنكرها! او إني تقريباً مبعرفش أعبر عن اللي جوايا صح غير بالكتابة! و إني تقريباً كده انا لسه بحبك وفكراك!  و أني كنت تقريباً بشم ريحة اللي بحبهم لما يطول غيابهم عني، لكني تقريباً فقدت حاسة الشم !  وأني ساعات ببقي تقريباً مبسوطة وراضية بكل تفصيله في حياتي لدرجة إني مبفهمش هو أنا كنت متضايقة ليه؟!  وإن تقريباً اللون الأزرق لوني المفضل او يمكن الرمادى، فعلاً معرفش! او إني تقريباً بحب الـ random photos اللي بتكون علي ألبوم الموبايل وبسرح فيها بالساعات وإن تقريباً نفس الصور اللي  بتضحكنى بتسبب لي حزن كبير!  "تقريباُ" عند اللي زي مش مجرد كلمة كده والسلام ، هى أقرب مايكون لـ وصف حالة بنعيشها ! وصف لـ خط النص، مابين القرب او البعد الكامل!  it's " Almost "  but not...