التخطي إلى المحتوى الرئيسي

عن الخوف وسنينه







عارف ايه معنى انك تخاف من خوفك..؟!يعنى بدل ماتخاف بس وده احساس طبيعى جداا..تبدى تخاف من انك فعلا تخاف..!! مفهمتش صح..!!
افهمك..اصل الحكاية دى بتحصلى كتييير مع الاسف..وهى كده حالة من الخوف المركب..يعنى مثلا خوفك من انك تفقد الحد اللى انت بتحبه يخليك تفقده فعلا..!! وخوفك من احلامك لتطير منك مهما جريت وراها..يخوفك فعلا..وتبدى دايما تشوف نفسك فى واقع ضياع احلامك منك واستحالة تحقيقها..وده طبعا هديك دفعة قوية من الاحساس بالفشل..مع انك اغلب الظن ممكن تكون لسه معملتش حاجة اصلا..بس اهو كده فشل وخلاص (بتنكد على نفسك من الاخر)..ووقتها برضه مينفعش تزعل لان معنى انك حاسس بالفشل ده ممكن يديلك دفعة لانك تكون ناجح..الا بقى لو انت حد فقرى وساعتها دى مش مشكلتنا..
ونرجع مرجعونا للخوف..الحالة دى او نوعية المشاعر دى مش محتاجة لتعريف او كلام علمى مكلكع..لان معتقدتش ان فى حد ميعرفش الخوف ولا يعرف توابع الخوف..اللى هى ردود افعالنا ناحيته واللى بالتبعية بتختلف بأختلاف كل شخصية.. او بأختلاف الظرف مثلا سواء كان زمان او مكان..
وطبعاا خالينا متفقين على طول الخط ان فكرة انك مبتخفش دى كذب وخداع وتضليل من هنا لبكره..لان الخوف نزعة انسانية خالصة واختفائها يعنى اختفاء حاجات كتير بالتبعية..زى الشجاعة مثلا..والشجاعة مش عكس الخوف..هتوقلى ازاى..هقولك اهو كده..الشجاعة مجرد رد فعل من ردود افعال كتيير بنعملها لما بنخاف..لانك متقدرش تقول ان الشجاع مبيخفش..لا بيخاف..بس هو عنده اللى مخليه واثق من نفسه كفاية قدام خوفه..زى ايمانه بالله مثلا..او ايمانه بذاته وبقدراته..وتخطيطه فى اوقات كتير خصوصا لو شخصية عقلانية بزيادة. والشجاعة فى مواجهة الخوف رد فعل ايجابى طبعاا.. وده على عكس السلبى من ردود الافعال اللى بخش فى نطاقها التجابن..الاستسلام..الضعف..والعمل بالمثل الشعبى القائل: الباب اللى يجيلك منه الريح سده واستريح..يعنى نفضت واستسلمت وانتهينا..
والخوف فى مجمله ع الاقل بالنسبالى..اشبه بالعيش على الحافة..اوبمعنى مجنون اكتر شبه لعبة قطر الموت فى دريم بارك..!!متقولش عليا هابلة وانا اقولك ازاى نظرية الخوف متجسدة فيها..اولا اللعبة فعلا تخوف..!!زى الدنيا كده..اما بنكبر ونكتشف انها وسعة اووى وكبيرة وملهاش اول من اخر..وثانيا نظرية حزام الامان اللى بتلبسه فى اللعبة..هو فى الحقيقة تأمين من ردود افعالك لما تخاف والخوف يكبر ويزيد هتعمل ايه..فهما كان رد فعلك فى حزام الامان ده..واللى ممكن يكون على ارض الواقع ربنا وثقتك فيه..اهلك..اصحابك..خططتك..تعليمك (ولو انه معدش ينفع)..الخ من الحاجات اللى ممكن تحسسك بالأمان..الجميل بقى فى اليلة دى كلها انك تفتح عينك على اخرها وتستمتع بنفسك وانت خايف ويبتواجه خوفك..ومتغمضش لانك لو غمضت هتفضل برضه خايف بس خوف زيادة شوية لانك زودت على نفسك خوفك من اللى انت مش عايز تشوفه..ده طبعا الى جانب خوفك من المجهول وده الاحساس الطبيعى الى عندنا كلنا واللى اتخلقنا بيه واللى بيصحبه بالتبيعة سلام نفسى من فكرة لو علمتم الغيب لاثارتم الواقع..ودى من المفارقات الغريبة والكتيرة اللى اتخلقنا عليها..
الملخص بقى..مش مهم انك تخاف او ان خوفك يسيطر عليك ويوصلك لحالة الضعف واليأس ومتعرفش فى وقت تسيطر على نفسك وترجعها للطريق السليم.. المهم انك تعرف تستغل خوفك لصالحك مهما كان خايف من بكره خطط ليه.. خايف من احلامك لتضيع ايه اللى موقفك اجرى وراها بعزم مافيك من قوة.. الحكاية بس محتاجة شوية جرأة علشان تعمل اللى انت بتخاف منه وعلشان تعرف ان فشلك عبارة عن طريق مختصر لنجاحك..وانك بحركة واحدة ممكن تهش كل الدبان اللى حوالين راسك وهريك زن وغتاتة..
 أريش فروم :غياب الخوف علامة على انعدام الخيال والذكاء اوالرغبة فى الحياة

تعليقات

المشاركات الشائعة من هذه المدونة

كيف ‏بدأت ‏نوبات ‏القلق

- بداية الـ anxiety disorder معايا كانت تقريباً من 2010 .. كنت لسه في الجامعة وبدأت أدخل في دوامة اكتئاب بسيطة سببتلي أرق بشع ( كنت بنام ساعتين في اليوم مثلاً) وانعدام الرغبة في الأكل. - في أواخر 2012 الـ anxiety بدأ يسببلي مشاكل واضحة في المعدة، وبقي سهل جداً لو توترت زيادة عن اللزوم اجيب كل اللي اكلته! ووقتها وزني نزل من 87 لـ 77 في فترة أقل من شهر! - في 2015 عرفت الـ Panic attack لأول مرة. جاتلي في الشغل! والشهادة لله دي كانت أعنف مرة. بدأت بعياط هادي وبعدها ضيق تنفس ثم انخفاض حرارة الجسم مع رعشة ثم رؤية ضبابية بالكامل ودوخة مع زيادة ضيق التنفس! افتكرت يومها اني هموت خلاص. وعشان افوق منها اخدت وقت وباقي اليوم كنت مرهقة جداً ونفسي تقيل. - في 2018 مشاكل الأرق بدأت ترجع وقررت احاربها بممارسة الرياضة 3 ساعات على الأقل يومياً. كنت بخلص شغل، اروح الجيم، اروح البيت اخد شاور وانام! وده بالنسبالي كان يوم عظمة! -من 2019 وطبعاً خلال 2020 بعاني بشكل شبه يومي مع الـ anxiety وال Panic attack واوقات كتير أساليبي في محاربتهم بتفشل وبستسلم للنوبات! - رحلة 10 سنين تقريباً مع "الكلاب السعرانة الل...

من شرفة القمر إلى دهاليز العقل

أتأمل البدر المكتمل من مقعدي الخلفي في السيارة، أتابعه طوال الطريق وهو يمرّ من وسط الغيوم إلى السماء الصافية، وهكذا دواليك. أتابعه ببلاهة طفلٍ في الرابعة من عمره، يظن فرِحًا أن القمر يتبعه أينما ذهب تربطني بالقمر علاقة لا أفهمها كثيرًا، لكني أحبها. أعشق مشاهدة البدر، ويمكنني أن أحدق فيه لساعات دون ملل. وعلى الرغم من معرفتي بأن القمر لا يسير معي حقًا، إلا أنني أنزعج كثيرًا حين تحجبه الأبراج والعمارات العالية عني فجأة! أكره القاهرة في معظم الأوقات لأسباب عديدة، وربما كانت هذه من أبرزها . على مدار أعوام، كان القمر صديقي الوحيد، لا يملُّ منّي.  أنا صاحبة العقل الذي لا يهدأ ولا ينام. أحدثه كثيرًا، وأصمت أكثر عندما تتداخل الأفكار في رأسي، وتغمرني مشاعر متناقضة لا أستطيع التعبير عنها . تعلمت مؤخرًا دعاءً أكرره يوميًا: "اللهم اصرف عني شتات الأمر والعقل والتفكير". أتمسك به كلما عدت من شرود طويل بين مئات الأفكار والتساؤلات . مؤخرًا، وصفني أحدهم بأنني هادئة. وقالت لي أخرى إن والدتها تتمنى ابنة مطيعة مثلي! أثار الأمر دهشتي لوهلة، ومرَّ أمام عيني شريط طويل من المواقف - بطول سنواتي الأرب...

في وصف حالة "علي ما يبدو وتقريباً كده" !

ولأننا مش واثقين في حاجة/حد بشكل كامل فـ بتفضل تعاملاتنا كلها بين قوسين اسمه " تقريباً او Almost" فـ نكررها أكتر من مرة في وسط كل جملة بنقولها ! فأقولك إني تقريباً قربت أوصل للبيت، وتقريباً كده أنا أتغيرت .. وإني تقريباً بتضايق لما يتقال ولو بالهزار إني "مسترجلة" مع أنها حقيقة مقدرش أنكرها! او إني تقريباً مبعرفش أعبر عن اللي جوايا صح غير بالكتابة! و إني تقريباً كده انا لسه بحبك وفكراك!  و أني كنت تقريباً بشم ريحة اللي بحبهم لما يطول غيابهم عني، لكني تقريباً فقدت حاسة الشم !  وأني ساعات ببقي تقريباً مبسوطة وراضية بكل تفصيله في حياتي لدرجة إني مبفهمش هو أنا كنت متضايقة ليه؟!  وإن تقريباً اللون الأزرق لوني المفضل او يمكن الرمادى، فعلاً معرفش! او إني تقريباً بحب الـ random photos اللي بتكون علي ألبوم الموبايل وبسرح فيها بالساعات وإن تقريباً نفس الصور اللي  بتضحكنى بتسبب لي حزن كبير!  "تقريباُ" عند اللي زي مش مجرد كلمة كده والسلام ، هى أقرب مايكون لـ وصف حالة بنعيشها ! وصف لـ خط النص، مابين القرب او البعد الكامل!  it's " Almost "  but not...