الدنيـــــــــا..كرنفـــــال

الدنيا ديه غريبة وبألف حال وحال..!!

يوم العيشة حلوة ويوم نقول البخت مال..

يوم الضحكة تملى القلب والعين..

ويوم الحزن والهم يركبونا ومنعرفش دول جم منين..

الدنيا دى اكبر عجيبة..فيها ناس كتير غريبة..

ناس بتضحك وقلوبها مليانة دموع..

وناس دمعتها سابقة ضحكتها..

والاتنين صرخة مكتومة وسط الضلوع..

وناس مش عاجبها حالها..ودايما تشتكى وتملا الدنيا نواح..

وناس ماشية بهموم تقل الجبال.. وقلوبها مليانة جراح

ولا ليها صوت مسموع..

وناس تايهة فى الدنيا مش لايقة بر امان..

ماشية تدور ع الحنان..فى زمن عنوانه القسية

وغياب الضمير..

وناس عايشنها بالطول والعرض..

وكلينها ولعة ووخدين حقهم..

واحنا طبعا مش منهم..احنا الغلابة المظلومين..

وياسلام ع الناس الريقة والهايصة..

دماغها عالية وتمام..

مكبرة للدنيا وكل اللى فيها..!

شعارها ياعم سيبك دول ناس لايصة..

خليك دماغ خفيفة تكسب وتعيش..!!

وطول مأنت مهيس هتفضل كويس..

مش مهم ابدا التركيز..!!!

وناس شايفة الدنيا عتمة وسودة..!!

وناس شايفها جنة..وعايشة سعيدة ومبسوطة..!!

وناس راضية بأى حال..مرة حلوة..ومرة مره..

مش مهم طول ماهى ماشية..!

لان دوام الحال من المحال..!!

ناس ساكتة وراضية بالنصيب..مطلبتش ابدا حقها..!!

مع انه من حقها..تطلب بزعيق وصويت..!!!

بس ياخوفى من قسوة الظالم..وضعف المظلوم..

حكموا علينا نسكت ونخاف..خلوا الكلام ممنوع..!!

اما الناس الحكيمة..فدول ناس راجعية..وطريقتهم قديمة..!!

عشتهم كلها حكم ومواعظ..!!!

من الاخر عايزين الحرق فى اقرب بنزينة..!!!

دول عينة من ناس..لكن لسه فى ناس تانية كتيرة..!!

مالدنيا واسعــــــــــــــــــة وكبـيـــــــــــــرة..!!

واللى يعيش فيها ياما يشوف..وطول ماهى ماشية والعجلة دايرة..يبقى الحكايـــــــــــــــــة مخلصتش....بالعكس دى لسه

طويــــــــــــــــــــــــــــلة.