انا المرايــــــــــــــــــــــــــــــــا

انا المرايا..انا المرايا اللى هتقولك ايه

الحكاية..انا المرايا اللى انت بتقف قدامها كل

يوم بس عمرك ماشفت نفسك فيها،انت اغلب الوقت

بتشوف فيها حد تانى خالص ..حدغيرك..من الاخر مش

انت خالص..

بس انا بقى المرايا اللى شايفاك ومش بس انا

شايفة ملامحك لا انا كمان شيفاك من جوه..شيفاك على

حقيقتك..انت قدامى واضح تماما..شفاف

جدااااااااا.

انا وبس اللى عرفاك مش حد تانى..انا وبس اللى

شايفة فيك الوحش قبل الحلو..وانا وبس اللى انت

مبتحبش تقف قدمها..انا المرايـــــــــا.

انا.. انت..انت اللى بتهرب منه لحد تانى مش

شبهك..انا انت اللى عمرك ما اعترفت بيه انا كل

حاجة حلوة دمرتها بأيدك..وكل حاجة وحشة عملتها فى

يوم..انا انت اللى عمره ما كان شيطان ولا يوم

هيكون ملاك..

انا انت اللى دايما بتحمله اخطائك..انا انت الشئ

الضعيف،المسكين،المثير للشفقة،الكداب،الضايع

الفاشل،اللى دايما محتاج مساعدة..

انا انت، بس انا اوضح،انا دايما صادق،حتى لما بعمل

الوحش بعترف بيه بكل صراحة...لكن انت كداب حتى

معايا برضه كداب..بس المشكلة انك لما تكدب على اى

حد ممكن يصدقك، لكن انا عمرى ما اصدقك ولا انت

تقدر تخدعنى حتى..لان انا شيفاك..سمعاك..حساك..انا

مرايتك

لو نفسك حقيقى ترتاح من كل العذاب والجراح ونفسك

تعرف مالك..تعالى ليا..اقف بكل شجاعة قدامى..شوف

نفسك..شوفنى..وانت لوحدك هتعرف الحكاية من غير حتى

ما تسأل المرايـــــــا

هتعرف سر عذابك،هتعرف وهترتاح وانا كمان هرتاح

بس ابقى اقف قدامى..وانت اكيد عارف الطريق.