ااحبــــــــــــــك..اكــــــــــرهـــــــــــك..!!!

يعنى ايه كلمة وطن..؟!

ايه اللى بيخلينى اقول ان مصر دى هى بلدى..؟!

بمعنى اصح انا ايه اللى رابطنى بيها،بالرغم من كل بلاويها.

ايه اللى مخلينى صابرة على العيشة فيها ومقررتش مثلا

انى اسافر منها بأى طريقة زى ما غير عمل..؟!

انا مش هغنى ولا هقول شعارات ولا هقول حتى ان لسه فى

مصر لانها امى..!!!!!!!!!!

ولانى مش قادرة اسيب حضنها....!!!!!!!!!!!

مصر مش امى ولا حتى حصلت تبقى مرات ابويا..

مصر عمله زى جدى...!!!!

الشخص ده طول عمرى بسمع عنه حكايات كتير جداااااا

بس عمرى ماشوفته غير فى الصور...!!!

اكتر من كده مفيش،بالضبط زى مصر وعلاقتى بيها..

طول شهر اكتوبر اسمع انجازات وبطولات وناس بضحى

وناس تتشاهد وناس عاشت لمصر وماتت علشانها..

لكن طول السنة الباقية هناك حالة من الصمــــــــــــت...!!!

الحكاية يا جماعة بكل بساطة ان مصر دى دونا عن كل بلاد

العالم المعاصر اللى اتولدت فيها..

ومش بس اتولدت فيها لا دا كمان بيتى فيها..

وانا من الناس اللى بتعشق بيتها بغض النظر عن سلبيات كتير

ممكن تكون فيه، فانا من عشاق البيت والاسرة واللمة.

وبالنسبة ليا قعدتى مع اهلى فى البيت بالدنيا..

ممكن كتير ميتفقش معايا فى ده،لكن لو جرب يبعد عن اهله

وعن بيته اكيد هيصدقنى..

ومصر بقى مفيهاش بيتى وبس..

مصر فيها كل حاجة اعرفها من اصحاب،قرايب،جيران

الناس اللى دايما فى بالى ، والناس اللى ممكن وانا قاعدة

فجأة افتكرهم وافتكر معاهم ايام زمان..

مصر فيها كل ذكرياتى الحلوة والوحشة..

مصر فيها الشوارع اللى مشيت فيها مع اهلى واصحابى

وقضيت معاهم فيها وقت اتمنى انه يرجع تانى..

مصر موجودة فى كل صورى...!!!!

حتى الاماكن اللى سفرت ليها كانت جواها..!!!

ببساطة كده مصر فيها عمرى كله من اوله ولحد دلوقتى..

مش قادرة محبهاش..بس مش عارفة ازاى مكرهاش..!!!!!!

مصر كانت عندى زمان حلم جميل...

لكن دلوقتى مصر عندى حلم صعب،لكن عمره مايكون

مستـــــــــــحيـــــــل...!!!!!!!!!!

ويمكن الكلام عن مصر يطول ويكون فيه زيادة بس كده

كفاية لاحسن احن ليها واحبها...!!!!!!

وانا مش عارفة احبـــــــــــها ولا اكرههــــــــــــــــا...!!!